Istanbuldiki qanliq hujumda hayatidin ayrilghan abdulhekim bughda yerlikige qoyuldi

Ixtiyariy muxbirimiz arslan
2016-07-02
Share
abdulhekim-bughda-turkiye-istanbul-partlash-jinaza.jpg Istanbul atatürk ayrodromidiki térror hujumida hayatidin ayrilghan türkiye puqrasi Uyghur abdulhekim bughdaning jinaza namizi
RFA/Arslan

Istanbul atatürk ayrodromidiki qanliq térror hujumida üch yérige oq tégip hayatidin ayrilghan türkiye puqrasi Uyghur abdulhekim bughdaning jinaza namizi 30 - iyun peyshenbe küni esir namizidin kéyin zeytinburnu amine inanch jamisi aldida oquldi. Uning jinazisigha türk bayriqi yépildi.

Zeytinburnu sheher bashliqi murat aydin, türk hawa yolliri mudiri temel kotil, türk hawa yolliri idarisi bashliqi ilker ayji, abdulhekim bughdaning akiliri esqer bughda, exmet bughda, iqbal bughda we uruq - tughqanliri, istanbuldiki Uyghur teshkilatlarning mes'ulliri we ezaliri, shundaqla zeytinburnu we etraptiki rayonlardin kelgen Uyghur, qazaq, türk qatarliq her millet kishiliridin bolup, nechche ming kishi abdulhekim bughdaning méyit namizigha ishtirak qildi.

Biz, abdulhekim bughda we bu hujumda hayatidin ayrilghan barliq musulmanlargha allahtin rehmet tileymiz. Uning a'ilisige shundaqla musibetke uchrighan barliq a'ililerge sebre tileymiz.

Biz abdulhekim bughda toghrisida uning qoshnisi hamut köktürk ependi we merhumni yaxshi tonuydighan sherqiy türkistan wexpi idare hey'et mes'ulliridin tibet yüjektürk ependi bilen söhbet élip barduq.

Tibet yüjetürk ependining bildürüshiche, abdulhekim bughdaning ata - anisi Uyghur diyaridin türkiyege köchüp olturaqlashqan muhajir a'ile bolup, uning töt akisi bar iken. Merhum abdulhekim 1991 - yili istanbulda tughulghan, u toluq ottura mektepni püttürgendin kéyin eskerlikke qatniship herbiy wezipisini ötigen kéyin istanbul atatürk ayrodromigha ishqa orunliship xizmet qilghili 2 ay bolghan iken.

Istanbul atatürk ayrodromidiki qanliq térror hujumi élip barghuchilar
Istanbul atatürk ayrodromidiki qanliq térror hujumi élip barghuchilar

Térrorluq hujumchilarning kimlikliri éniqlandi

Istanbul ayrodromida meydan'gha kelgen bomba bilen özini qoshup partlitish hujum qilip 44 kishining jénigha zamin bolghan 239 kishini yarilandurghan üch térrorchidin ikkisining isim kimlikliri éniqlandi.

Bu hujumni keltürüp chiqarghan térrorchilardin birsining ismi wadim osmanuf, yene birining bolsa rakim bulgaruf ikenliki, rusiye pasporti bilen istanbulning fatih rayonida bir öyning bir yilliqini ijarige élip olturghanliqi bildürüldi. Öy ijarige élish üchün öy - mülük shirkitige bergen pasport kopiyesidin bu qanliq hujumni keltürüp chiqarghan kishiler ikenliki éniqlandi.

Ijarige alghan öyge yéqin etraptiki bixeterlik közitish apparatini tekshürüsh élip barghan saqchilar bu hujumchilarning shu küni kech sa'et 8:35 te öydin chiqqanliqini we öyge yéqin etraptiki exlet sanduqigha bir nersini atqanliqini bayqidi. Saqchilarning tekshürüsh netijiside térrorchilar hujum nishanini pilanlighan kompyutérni mix qéqish arqiliq qattiq diskisini buzuwétip, exlet sanduqigha tashliwetken. Saqchilar kompyutérdiki uchurlarni eslige keltürüshke tirishmaqta iken.

Hayatidin ayrilghanlarning sani 44 ke yetti

Bu weqede yarilan'ghanlardin 25 yashliq yasin öjal jiddiy qutquzush bölümide hayatidin ayrilghan bolup, buning bilen bu qanliq weqede ölgenlerning sani 44 ke chiqti.

Istanbulda 16 kishi tutqun qilindi

Saqchilar istanbul atatürk ayrodromidiki qanliq térror hujumigha alaqidar istanbulning 16 jayidiki adrésqa oxshash waqitta basturup kirip tekshürüsh élip bardi. Netijide 3 chet'ellikni öz ichige alghan 16 kishi tutqun qilindi. Hazir istanbul saqchi idariside tutup turuluwatqan bu kishiler üstidin teptish qilinmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet