Истанбулда норуз байрими паалийити өткүзүлди

Ихтиярий мухбиримиз арслан
2014.03.21
istanbul-noruz-2014.jpg Истанбулдики норуз паалийити
Photo: RFA


21 - Март күни түркийиниң охшимиған шәһәр вә районлирида норуз байримини тәбрикләп һәр хил паалийәтләр өткүзүлди.

Үмид, бирлик, бәрикәт, қизғинлиқ, қериндашлиқ вә баһар пәслиниң хушаллиқи ипадилинидиған норуз байрими истанбулда қизғин күтивелинди.

Истанбулдики түрк дуняси бағчисида өткүзүлгән норуз байримини тәбрикләш паалийитигә истанбул валийиси һөсәйин авни мутлу, түркийә 66 - пиядә қисимниң баш генерали камал башақ, истанбул муавин шәһәр башлиқи әхмәт саламәт, қибрис, әзәрбәйҗан, қазақистан, қирғизистан, түркмәнистан, өзбекистан қатарлиқ дөләтләрниң истанбулдики консуллири вә истанбулда яшаватқан уйғур, қазақ, қирғиз, өзбек, түрк, түркмән қатарлиқ хәлқләрдин көп санда киши қатнашти.

Түркийиниң меһтиран гурупписи - миллий чалғу гурупписиниң марш оқуши билән башланған программида түрк дунясниң охшимиған җайлиридин кәлгән хәлқ вәкиллири өзлириниң миллий өрп - адәтлири бойичә номур тәқдим қилди. Кейин истанбул валийси һөсәйин авни мутлу вә һәмраһлири, шәрәп меһманлар бирликтә базған билән төмүр соқти, от йеқип, өттин атлиди, тохум соқуштурди.

Ахбаратчиларниң соалиға җаваб бәргән истанбул валийиси һөсәйин авни мутлу норуз байрими тоғрисида тохтилип мундақ деди:

- Баһарниң хушаллиқи болған норуз һәммимизгә саламәтлик, хушаллиқ вә бәхт елип кәлгәй, бу гүзәл байрам, пәқәт анадулийәдә әмәс, бәлки пүтүн түрк дунясида, оттура асияда, кафказийидә, балқанларда кәң бир җуғрапийидә көплигән хәлқләрниң баһар байрими болуп тәбриклиниду. Бүгүн топрақ җанлинип күчәтләр бих сүриду. Шуниң билән һәммимизгә йеңи үмид вә хушаллиқ кәлтүриду, мәнму барлиқ көңүлсизликләрни арқида қалдурушни арзу қилип башта истанбуллуқлар, түркийә вә пүтүн түрк дунясиниң норуз байримини тәбрикләймән.

Кейин валий һөсәйин авни мутлу, түрк дуняси бағчисида қурулған түрк мәдәнийәт өйлирини зиярәт қилди, валий һөсәйин авни мутлу, уйғур зиннәт рестурани, қазақ өйи, қирғиз, вә өзбек өйлирини зиярәт қилип, уларниң миллий мәдәнийәт тамақлири вә өрп - адәтлири билән тонушуп чиқти.

Бүгүн охшаш вақитта йәнә, түркийиниң әски шәһәрдә норуз байримини тәбрикләш паалийити өткүзүлгән болуп бу паалийәткә түрк дунясидин 30 милләтниң вәкиллири қатнашти. Бу паалийәткә уйғурларға вакалитән миркамил қәшқәрли қатнашти вә оғли муҗаһид қәшқәрли паалийәтниң ечлиш мурасимида җараңлиқ шеир оқуп йиғин залини зилзилгә салди.

Муҗаһид қәшқәрлигә әскишәһәр валийиси оюнчуқ қатарлиқ маддий боюм һәдийә қилди вә муҗаһид билән тохум соқуштуруп норуз байримини тәбриклиди.

Биз бу һәқтә техиму көп мәлуматқа еришиш үчүн әски шәһәр түрк дуняси норуз байримини тәбрикләш паалийитигә қатнашқан миркамил қәшқәрли билән сөһбәт елип бардуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.