2- Nöwetlik sherqiy türkistanliqlar istratégiye muhakime yighini bashlandi

Ixtiyari muxbirimiz ekrem
2017-05-19
Élxet
Pikir
Share
Print
2-Nöwetlik sherqiy türkistanliqlar istratégiye muhakime yighini meydanidin bir körünüsh, 2017-yili 19-may, bérlin
2-Nöwetlik sherqiy türkistanliqlar istratégiye muhakime yighini meydanidin bir körünüsh, 2017-yili 19-may, bérlin
RFA/Ekrem

2-Nöwetlik sherqiy türkistanliqlar istratégiye muhakime yighini gérmaniyening bérlin shehiridiki holiday méhmanxanisida 19-may chüshtin burun sa'et 9:00 bilen bashlandi. Yighin'gha amérika, kanada, yaponiye, türkiye, norwégiye, gollandiye, shiwétsiye, shiwétsariye, gérmaniye qatarliq ellerdin kelgen 26 neper siyasiy erbab, ziyaliy, mutexessis we kishilik hoquq pa'aliyetchisi qatnashti.

Türkiye istratégiye mutexessisi doktor erkin ekremning orunlashturushi bilen chaqirilghan, héchqandaq teshkilat yaki siyasiy guruhqa wekillik qilmaydighan bu qétimqi yighin sherqiy türkistanning istiqlal marshini oqush bilen bashlandi. Istiqlal marshidin kéyin, Uyghur siyasiy erbabliridin erkin aliptékin ependi qisqiche échilish nutuqi sözlep, yighin ehlini öz millitining kelgüsi teqdirini muhakime qilishtin ibaret muqeddes bir xizmet üchün basqan mubaret qedemliri bilen qutlidi.

Erkin aliptékin ependining nutqidin kéyin, tunji nöwetlik sherqiy türkistanliqlar istratégiye muhakime yighinining doklati oqup ötüldi. Wekiller birinchi qétimliq yighin qolgha keltürgen utuqlargha yüksek bahalar bérishti.

Yighinning bügünki tunji programmisi 2003-yili doktor erkin ekrem teripidin hazirlan'ghan, 2004-yili 16-, 19-may künliri gérmaniyening myunxén shehiride, dunya Uyghur qurultiyida testiqtin ötken sherqiy türkistanning 3 basquchluq istratégiyelik pilanining tüzitilgen, toluqlan'ghan nusxisini yene bir qétim közdin köchürüsh boldi.

Chüshtin burun "Xelq'ara weziyetning özgirishi we mewjut mesililerni otturigha qoyush" témisi astida "Xelqara siyasiy we iqtisadiy tüzümdiki özgirishler hem aylinish", "Gherbning siyasiy we ijtima'iy qimmet qarashliri" qatarliq mezmunlar üstide muzakiriler boldi.

Mezkur yighinni teshkilligen doktor erkin ekrem ependi bu munasiwet bilen neq meydanda ziyaritimizni qobul qilghanda, bundaq bir yighinning orunlashturulushidiki meqset we sewebler heqqide toxtaldi.

Uyghur siyasiy erbabliridin erkin aliptékin ependimu ziyaritimizni qobul qilip, özining bu qétimqi yighindin bekla memnun bolghanliqini tilgha aldi.

Kanadadin kelgen Uyghur ziyaliysi ehmetjan osman ependimu, bu qétimqi yighinning ehmiyitini mu'eyyenleshtürdi we yighin'gha yuqiri bahalar berdi.  Gérmaniyedin kelgen Uyghur ziyaliysi perhat muhemmidi ependi yighin heqqide ziyaritimizni qobul qilghanda, bu yighinning süpet we sewiyisining alahide yuqiri bolghanliqini tekitlidi.

Tunji nöwetlik sherqiy türkistanliqlar istratégiye muhakime yighini bu yil 2-ayning 25- künidin 27-künlirigiche küzey qibris türk jumhuriyitining girne shehiride chaqirilghan idi. Shu qétimqi yighin'ghimu 12 dölettin 19 neper Uyghur qatniship, sherqiy türkistan milliy azadliq herikitining 3 basquchluq istratégiyilik pilanini közdin köchürgen we muhim qararlar qobul qilghan. Bu qétimqi yighin Uyghur diyaridiki künséri jiddiylishiwatqan weziyetni nezerge alghan halda, birinchi qétimliq yighindin 3 ay kéyinla gérmaniyege orunlashturulghan.

Pikirler (0)
Share
Toluq bet