Fransiyediki sodiger jür'et: “Rast geplirim xitaydin menpe'etliniwatqan kishilerni bi'aram qildi”

Xitay hökümitining Uyghurlargha qaratqan bésimliri barghanche kücheygen bir weziyette her xil sewebler bilen gherb döletliride olturaqliship qalghan Uyghurlarningmu her xil bésim we tehditlerge uchrawatqanliqi melum bolmaqta.

Bu seweblerdin chet'ellerde yashawatqan bir qisim Uyghurlar arisida özi we wetendiki uruq-tuqqanliridin ensiresh psixikisi kücheygen. Chet'ellerdiki bir qisim Uyghurlar yuqiriqi türlük seweblerdin Uyghur teshkilatliri we jama'itidin yiraqliship, yégane yashash, xelq'ara taratqular we ijtima'iy alaqe torlirida élan qilin'ghan Uyghurlarning xitay hökümiti teripidin basturuluwatqanliqigha a'it xewer-uchurlargha inkas qayturmasliq, xitay hökümitining Uyghurlargha qaratqan milliy siyasitini tenqitligüchilerdin narazi bolush, hetta ularni tosushqa urunush qilmishlirida boluwatqanliqi otturigha chiqmaqta.

Aldinqi hepte radiyomiz Uyghur bölümining ziyaritini qobul qilip, xitay hökümitining Uyghur siyasitini ashkara tenqitligen firansiyediki zibu-zinnet layihiligüchisi we sodigiri jür'et ependi, bügün yene ziyaritimizni qobul qilip, özige kelgen inkaslargha jawab qayturdi. U, özige kelgen zor bir qisim inkaslarda uni qollash keypiyati küchlük bolsimu, emma yene bir qisim kishilerning uninggha téléfon yaki uchur wasitiliri arqiliq inkas qayturup, naraziliqini ipadiligenliki hetta uni dawamliq xitay hökümitini tenqid qilishtin tosqanliqini bildürdi.

Jür'et ependi, erkin, démokratik döletlerde yashap turuqluq xitay hökümitining bésimidin qorqqan az bir qisim Uyghurlardiki bu xil qorqush keypiyatining sewebliri heqqide öz qarishini bayan qildi. Bu xil kishilerning xitay hökümitidin yenila ümid kütüwatqanliqi yaki xitay hökümitidin kélidighan menpe'ettin waz kéchelmigenliktin erkin, démokratik döletlerde yashap turuqluqmu xitay hökümitige qarshi pa'aliyet we söz-heriketlerdin rahetsiz boluwatqanliqini ilgiri sürdi.