Kanada bash ministiri we millet wekilining ramizanliq sözi alqishqa érishti
2016.06.13
Kanada bash ministiri jastin trudow ramizan munasiwiti bilen söz qilmaqta
Yéqinda, kanadadiki libéral partiyesidin bolghan millet wekili mark hollandning, kanada parlaméntida ramizan heqqide qilghan ijabi sözliri ammiwi taratqularda alqishqa érishti. Parlaméntta söz qilish üchün ruxset alghan mark hollandning, siyasiy weya iqtisadi mesililer heqqide emes, belki ramizanning ehmiyiti we xasiyiti heqqide toxtilishi diqqet chekti.
“Roza tutush nahayiti yaxshi bir ish” ikenlikini bildürgen mark holand ötken yili roza tutqanliqini we bu yilmu roza tutmaqchi ikenlikini bildürdi.
“Roza tutush arqiliq bashqilargha yardem qilghili bolidu”
Roza tutush arqiliq dunyadiki milyonlarche kishige yardem qilghili bolidighanliqini bildürgen holland “Ramizanda roza tutup kün boyi bir nerse yimigendin kéyin, pulingiz yanchughingizda qalidu. Bu pullarni pulgha éhtiyaji bolghanlargha yardem qilalaysiz we ularning yimek - ichmek mesilisini hel qilip béreleysiz” dédi.
Undin bashqa yene kanada bash ministiri justin tréduning ramizan heqqide qilghan tebrik sözimu kanada we dunya miqyasida alqishqa érishken.
“Rohi yolchiliq”
Ramizan heqqidiki tebrik sözini, essalamu eleykum rozi ramzanliringlar mubarek bolsun dep bashlighan justin trédu sözide,“Kanada we dunyadiki barliq musulmanlarning, qur'an kerimning hezriti muhemmet eleyhisalamgha wehiy qilin'ghanliqini xatirlesh üchün, bir ayliq roza, namaz we tepekkür qilish birleshtürülgen ruhsal yolchiliqqa chiqidighanliqini, musulmanlarning bir ay ramizanda, roza tutush arqiliq allahqa bolghan yéqinliqini, namratlargha nisbeten qolini keng échiwétidighanliqini bildürdi.” trédu ramizan tebrik sözini yene mundaq dawamlashturdi: “Ramizan musulmanlarning öz - ara ich qoyun bolghan bir mezgilidur. Bu ayda musulmanlar qoshniliri we dostlirini iptargha chaqirip, teng yiyishidu, birlikte ibadet qilidu we bir - birlirini sediqe bérishke, shundaqla xeyr saxawetlik bolushqa ündeydu. Ramizan, alla bergen nimetlerge shükri qilishni we bu nimetlerge sahip bolalmighanlarni özimizdin awwal oylishimiz kéreklikini xatirilitidu.”
“Kanadaning köp xil medenyet alahidiliki”
Kanadaning köp xil medenyetlerge ehmiyet béridighan bir dölet ikenlikini bildürgen justin trédu, “Kanadaning köp xil medenyetlik alahidiliki, dölitimizning eng muhim küchlirining biri bolghinigha oxshashla, eyni chaghda yene eng muhim ghurur menbesi bolup hésablinidu” dédi.
Ilgiri musulmanlar bilen birlikte namaz qiliwatqan resimliri kengri tarqalghan justin tréduning, roza tutqan musulmanlar bilen birlikte iptar qilishi we tebrik sözi sözlishi, ammiwi taratqularda qizghin alqishqa érishkenliki melum.
Gerche kanadaning aliy derijilik emeldarliri ramizan heqqide ijabiy köz qarashlirini ipadilep ramizan we roza tutushni medhiyelewatqan bolsimu, emma xitayda roza tutush cheklen'gen. Ikki dölet otturisidiki bu zor perq heqqide mulahize yürgüzgen, kanadada yashawatqan Uyghur ziyaliysi memet toxti ependi mulahize yürgüzüp, “Uyghurlar ming yillardin buyan islam dinigha étiqad qilip keldi, Uyghur wetinige tünügün kelgen az sandiki xitaylarning mejburlishi bilen diniy eqidiliridin waz kechmeydu” dédi.
Bu programmining tepsilatini yuqiridiki ulinishtin anglighaysiler.
Köp körülgen xewerler
RFA
- Abduweli ayup: “Xitaygha bérip kéliwatqan Uyghurlarning köpiyishi jiddiy mesile!”
- “Uyghur xelq naxshiliri” ni ögitishmu yaki Uyghurlargha “Heywe” körsitishmu?
- Amérika awam we kéngesh palata ezaliri xitayning gülshen abbasni derhal qoyup bérishni telep qilghan
- Uyghurshunaslar: prinséton uniwérsitétida “Eziz eysa elkün Uyghur edebiyati eserliri toplanmisi” ning bolushi tarixiy ehmiyetke ige
- Amérika emgek ministirliqi yighinida “Uyghur mejburiy emgikining aldini élish qanuni” ni qattiq ijra qilish kérekliki qayta tekitlendi