Канада алаһидә визиси аилиләрниң җәм болушиға қолайлиқ яратти

Ихтиярий мухбиримиз руқийә
2013.03.11
Share on WhatsApp
Share on WhatsApp
canada-kochmen-kanada-graphic-305.jpg Канададики көчмәнләр вә муддәтсиз туруш салаһийити болмиғанларниң келиш мәнбәси көрсәтмиси.
en.wikipedia.org

Канадада йеңи йолға қоюлған алаһидә виза түзүми, канадаға йәрләшкән көчмәнләрниң башқа дөләтләрдики уруқ-туғқанлирини чақиртип келишигә көп қолайлиқ яратқан. Буниң билән йиллардин бери айрилип яшашқа мәҗбур болған миңлиған аилә канадада җәм болған.

Канада көчмәнләр идарисиниң хәвәр қилишичә, 2011-йили 12-айдин тартип 15 миңдин артуқ ата-ана вә чоң ана-чоң атаниң канадаға келишигә виза берилгән. Улар канада гражданлиқ вә көчмәнлик министирлиқиниң министири җәйсон кәннй йолға қойған алаһидә виза арқилиқ кәлгән.

Бу хил виза, беҗирилиш вақтиниң тез вә рәсмийәтлириниң аддий болуши билән канада көчмәнлириниң қизғин алқишиға еришкән болуп, аилиләрниң җәм болушиға қолайлиқ яратқан.

Мәлум болушичә, һәр айда 1000 дин артуқ алаһидә виза бериливатқан болуп, илтимас қилғучиларниң визиға еришиш нисбити 86% тин юқири икән.

Канада көп милләтлик, көп мәдәнийәтлик көчмән дөлити. Илгири канада һөкүмити көчмәнләрниң ата-ана уруқ-туғқанлириға кепиллик визисини йолға қойған. Униңдики шәртләр еғир болғачқа нурғун кишиләрниң ата-анисини чақиртип келип көрүшүши қийинға тохтап кәлгән иди.

Көчмәнләр адвокати памила ханим зияритимизни қобул қилип, алаһидә виза билән кепилликкә чақириш визиси оттурисидики пәрқләр үстидә тохтилип мундақ деди: алаһидә виза 5-10 йиллиқ муддәт билән берилидиған болуп, чақирғучиниң ата-аниси бу муддәт ичидә халиса кетип, халиса келип туриду. Канадаға мәңгүлүк олтурақлашқучи сүпитидә кәлмәйду. Кепиллик билән чақирилған ата-анилар мәңгүлүк олтурақлишиш үчүн келидиған болуп, мәңгүлүк олтурақлишиш һәл болғиниға қәдәр узун муддәт чақирғучи ата анисиниң пүтүн чиқимини көтүрүши өзлириму чоқум ата анисини шу муддәттә бақалиғудәк киримни муқим тутуп меңиши керәк. Ата-аниси вә яки чоң ата-чоң анисиға алаһидә визиға илтимас қилғучиниң чоқум дөләт тәрипидин бәлгиләнгән әң төвән кирими болуши керәк болуп, бу кепиллик визисиға илтимас қилишта бәлгиләнгән кирим билән асаси җәһәттин охшап кетидикән.
Памила ханим мундақ деди:канадада һөкүмитиниң тор бетигә кирип ахтурулса, у йәрдә чақирғучиниң канададики аилисиниң җан саниға қарита қанчә кишини чақиртиш үчүн қанчилик кирими болуши һәққидики учурлар бар. Адәттә әң төвән болған кирим чәклимисиму аилә җан саниға көрә охшимайду. Киримниң юқири төвәнлики җан сани вә шу аилидики ишләйдиған адәм саниға көрә бәлгилигән.

Канадаға панаһлиқ тиләш арқилиқ йәрлишиватқан кишиләрму наһайити көп. Мәлум болушичә, адәттә кепиллик визиси билән ата-анисини чиқарғучиларниң ата аниси кәлгәндин кейин панаһлиқ тилишигә тоғра келип қалса, гәрчә канада һөкүмити чақирғучидин бу тоғрида һечқандақ мәсулийәт сүрүштә қилмисиму, әмма чақирғучиниң кейин йәнә қайта башқиларни чақириш үчүн визиға илтимас қилиши қийин болидикән.

Памила ханим бу һәқтә тохтилип мунуларни ейтти: буниң чақирғучиға башқа тәсири болмайду, әмма, өзигә яман тарих яритип қойғанлиқтин, кейин қайта адәм чақириши тәскә тохтайду.

Памила ханимниң билдүрүшичә, алаһидә визиниң беҗирилиш рәсмийәтлири вә шәртлири интайин аддий болуп, пәқәт чақирғучиниң ата-аниси келиштин бурун саламәтлик тәкшүрүштин өтсила вә чақирғучи ата-аниси үчүн бир йиллиқ саламәтлик суғуртиси сетивалсила купайә.

Адәттә бу шәртләрни һазирлиғанлар башқа шәртләрдин өтүс мумкинчилики 99 пирсәнт болуп, уларниң виза елиши бурунқидин нәччә һәссә қолайлашқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.