Kanada alahide wizisi a'ililerning jem bolushigha qolayliq yaratti

Ixtiyariy muxbirimiz ruqiye
2013.03.11
Share on WhatsApp
Share on WhatsApp
canada-kochmen-kanada-graphic-305.jpg Kanadadiki köchmenler we muddetsiz turush salahiyiti bolmighanlarning kélish menbesi körsetmisi.
en.wikipedia.org

Kanadada yéngi yolgha qoyulghan alahide wiza tüzümi, kanadagha yerleshken köchmenlerning bashqa döletlerdiki uruq-tughqanlirini chaqirtip kélishige köp qolayliq yaratqan. Buning bilen yillardin béri ayrilip yashashqa mejbur bolghan minglighan a'ile kanadada jem bolghan.

Kanada köchmenler idarisining xewer qilishiche, 2011-yili 12-aydin tartip 15 mingdin artuq ata-ana we chong ana-chong ataning kanadagha kélishige wiza bérilgen. Ular kanada grazhdanliq we köchmenlik ministirliqining ministiri jeyson kenny yolgha qoyghan alahide wiza arqiliq kelgen.

Bu xil wiza, béjirilish waqtining téz we resmiyetlirining addiy bolushi bilen kanada köchmenlirining qizghin alqishigha érishken bolup, a'ililerning jem bolushigha qolayliq yaratqan.

Melum bolushiche, her ayda 1000 din artuq alahide wiza bériliwatqan bolup, iltimas qilghuchilarning wizigha érishish nisbiti 86% tin yuqiri iken.

Kanada köp milletlik, köp medeniyetlik köchmen döliti. Ilgiri kanada hökümiti köchmenlerning ata-ana uruq-tughqanlirigha képillik wizisini yolgha qoyghan. Uningdiki shertler éghir bolghachqa nurghun kishilerning ata-anisini chaqirtip kélip körüshüshi qiyin'gha toxtap kelgen idi.

Köchmenler adwokati pamila xanim ziyaritimizni qobul qilip, alahide wiza bilen képillikke chaqirish wizisi otturisidiki perqler üstide toxtilip mundaq dédi: alahide wiza 5-10 yilliq muddet bilen bérilidighan bolup, chaqirghuchining ata-anisi bu muddet ichide xalisa kétip, xalisa kélip turidu. Kanadagha menggülük olturaqlashquchi süpitide kelmeydu. Képillik bilen chaqirilghan ata-anilar menggülük olturaqlishish üchün kélidighan bolup, menggülük olturaqlishish hel bolghinigha qeder uzun muddet chaqirghuchi ata anisining pütün chiqimini kötürüshi özlirimu choqum ata anisini shu muddette baqalighudek kirimni muqim tutup méngishi kérek. Ata-anisi we yaki chong ata-chong anisigha alahide wizigha iltimas qilghuchining choqum dölet teripidin belgilen'gen eng töwen kirimi bolushi kérek bolup, bu képillik wizisigha iltimas qilishta belgilen'gen kirim bilen asasi jehettin oxshap kétidiken.
Pamila xanim mundaq dédi:kanadada hökümitining tor bétige kirip axturulsa, u yerde chaqirghuchining kanadadiki a'ilisining jan sanigha qarita qanche kishini chaqirtish üchün qanchilik kirimi bolushi heqqidiki uchurlar bar. Adette eng töwen bolghan kirim cheklimisimu a'ile jan sanigha köre oxshimaydu. Kirimning yuqiri töwenliki jan sani we shu a'ilidiki ishleydighan adem sanigha köre belgiligen.

Kanadagha panahliq tilesh arqiliq yerlishiwatqan kishilermu nahayiti köp. Melum bolushiche, adette képillik wizisi bilen ata-anisini chiqarghuchilarning ata anisi kelgendin kéyin panahliq tilishige toghra kélip qalsa, gerche kanada hökümiti chaqirghuchidin bu toghrida héchqandaq mes'uliyet sürüshte qilmisimu, emma chaqirghuchining kéyin yene qayta bashqilarni chaqirish üchün wizigha iltimas qilishi qiyin bolidiken.

Pamila xanim bu heqte toxtilip munularni éytti: buning chaqirghuchigha bashqa tesiri bolmaydu, emma, özige yaman tarix yaritip qoyghanliqtin, kéyin qayta adem chaqirishi teske toxtaydu.

Pamila xanimning bildürüshiche, alahide wizining béjirilish resmiyetliri we shertliri intayin addiy bolup, peqet chaqirghuchining ata-anisi kélishtin burun salametlik tekshürüshtin ötsila we chaqirghuchi ata-anisi üchün bir yilliq salametlik sughurtisi sétiwalsila kupaye.

Adette bu shertlerni hazirlighanlar bashqa shertlerdin ötüs mumkinchiliki 99 pirsent bolup, ularning wiza élishi burunqidin nechche hesse qolaylashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet