Монакода өткүзүлгән 98 хәлқара тәшкилатниң юмулақ үстәл йиғинида уйғурлар мәсилиси аңлитилди

Д у қ баш катипи долқун әйса әпәнди монакода

11 - Айниң 3 - , 4 - күнлири монакода “хәлқара җәмийәтләр иттипақи” намлиқ хәлқаралиқ тәшкилат уюштурған 98 тәшкилаттин 300 дин артуқ вәкил қатнашқан чоң йиғинға уйғур вәкиллириму иштирак қилип, уйғурларниң вәзийитидин доклат тәқдим қилди.

Монакода өткүзүлгән “хәлқара тәшкилатларниң юмулақ үстәл сөһбити” йиғиниға қатнишиватқан д у қ баш катипи долқун әйса әпәндиниң бүгүн монакодин бәргән мәлуматиға асасланғанда, баш шитаби белгийәниң бирюссел шәһиридә болған “хәлқара җәмийәтләр иттипақи” намлиқ хәлқаралиқ тәшкилат монакода уюштурған бу қетимқи юмулақ үстәл сөһбәт йиғиниға дуняниң һәр қайси җайлиридики 98 хәлқара тәшкилаттин 300 дин артуқ вәкил келип қатнашқан. Йиғинда сиясий, иҗтимаий, иқтисадий саһәләрдә мутәхәссис болған илим адәмлири түрлүк мәзмунларда доклатлар тәқдим қилған. Д у қ баш катипи долқун әйса әпәндиму уйғурларға вәкалитән йиғинға қатнишип, уйғурларниң нөвәттики вәзийити һәққидә мәлуматлар бәргән.

Долқун әйса әпәндиниң билдүрүшичә, бу қетимқи йиғинда көплигән хәлқаралиқ тәшкилатларниң вәкиллири билән алақә бағлаш, сөһбәт қуруш имкани болған. У сөзидә, бу қетимқи йиғиндин, тәшкилатларни иқтисадий вә тәшкилий җәһәттин күчләндүрүш тоғрисида көп билимгә игә болғанлиқини илгири сүрди.

Монако дуняда ватикандин қалса әң кичик дөләт һесаблиниду. Омуми йәр мәйдани 1.9 Квадират километир болуп, аһалиси 36 миң әтрапида. Долқун әйса әпәнди зияритимиз әснасида, бу кичик дөләтниң тәрәққияти билән уйғур диярини селиштуруп, өзидә һасил болған тәсиратларниму тилға елип өтти.

Монакода бу қетимқи юмулақ үстәл йиғинини уюштурған “хәлқара җәмийәтләр иттипақи” намлиқ хәлқаралиқ тәшкилат болса 1907 - йили қурулған болуп, долқун әйса әпәнди сөзиниң ахирида бу тәшкилат һәққидиму қисқичә мәлумат берип өтти.