Üchturpandiki bir paylaqchi: gumandarlarni bayqash üchün qoshnilirimizning témidinmu maraymiz, dérizisidinmu.

Uchturpan imamlirimda weqe peyda qilghandin kéyin qéchip yürüp heriket élip bériwatqan ikki neper qapyürek pida'iy abduréhim abdulla bilen sulayman toxtining aqiwitini éniqlash üchün, muxbirimiz bügün üchturpandiki ahalilerge qaytidin téléfon qildi. Téléfonni qobul qilghan bir onbéshi yeni bir paylaqchi ikki neper pida'iyning ta bügün'giche tutulmighanliqini ashkarilash bilen birlikte, özlirining yeni paylaqchilarning öz xizmetlirini qandaq élip baridighanliqi heqqide melumat bardi. Melum bolushiche, imamlirimdiki bir kentte 54 kishi qulaqliq wezipisi ötewatqan bolup, ular gumandarlarni bayqash üchün, kéchiliri bezide qoshnilirining témidin marilisa, yene bezide dérizisidin marilighan.

Shexsiy we a'iliwiy mexpiyetlik adette démokratik jem'iyetlerde yüksek derijide hörmet qilinidu we qanun arqiliq qoghdilidu. Uyghur milliy exlaqidimu, kishilerning shexsiy we a'iliwiy turmushigha köz tikküchiler maraqchi yaki paylaqchi dégendek selbiy namlar bilen atilidu. Közetküchilerning qarishiche, Uyghur rayonda atalmish muqimliqini qoghdashta charisiz qalghan xitay da'iriliri Uyghur xelqini ene shundaq ésil exlaq - adetliridinmu chetneshke mejburlimaqta. Yuqiriqi onbéshining bayan qilishiche, paylaqchiliq uning kündilik hayatining normal bir parchisigha aylan'ghan, xolum - qoshnilirimu, uning bu paylaqchiliqigha pisent qilmaydighan bolghan.