Qazaqistan Uyghurliri yash bokschi dilmurat mijitoftin köp ümidlerni kütmekte

Ixtiyariy muxbirimiz oyghan
2016-01-13
Share
qazaqistan-uyghur-box-boksiyorchi-dilmurat-mijitof.jpg Qazaqistandiki yash Uyghur bokschi dilmurat mijitof
RFA/Oyghan


Qazaqistandiki tenheriketning mushtlishish türliridin boks, karaté, kik - boksing, wushu - sanda, tay boksi, mu'ay - tay we bashqilar boyiche jumhuriyet we xelq'ara derijide tonulghan Uyghur chémpiyonliri köplep sanilidu.

Ene shundaq yashlarning biri, hazir almata shehiride yashawatqan dilmurat mijitoftur. U ziyaritimizni qobul qilip, özining qandaq qilip chémpiyon bolghanliqi we buningdiki ata - anisi hem trénérining roli heqqide mundaq dédi: "Tenheriketke kichikimdin qiziqattim. Bu qiziqish özimizning aqbulaq mehelliside bashlandi. Exmetjan aka achqan tenheriket zalida bashlidim. Birinchi bolup abduréshit abduraxmanof kélip, bizge ögetti. Ata - anammu méni qollighandin kéyin özümning qiziqishi nahayiti yuqiri boldi. 2008 - Yili dolqun akigha keldim. U méni qiziqturdi. Her bir tenheriketchining armini bar. Méning arminim olimpik oyunlirigha qatniship, chémpiyon bolush."

Dilmurat mijitof Uyghur tenheriketchiliridin abduréshit abduraxmanof, shah'abbas kamékof, shundaqla qazaqistanning ataqliq bokschiliri baxit sarsékbayéf, sérk sapiyéflardin köp öginip, shularni ülge tutidighanliqini bildürdi.

Abduréshit abduraxmanof ötken esirning 60 - we 70 - yilliri qazaqistandin chiqqan meshhur bokschilardin bolup, u memliket boyiche xelq'ara derijilik tenheriket mahiri dégen ataqni alghan tunji bokschidur. U amérika, yawropa, afriqida ötken boks boyiche xelq'ara musabiqilerning ghalibi, sowét ittipaqi boyiche ikki qétim chémpiyon atalghan.

Dilmurat mijitof 1995 - yili almata wilayitining Uyghur nahiyisige qarashliq chonjada dunyagha kelgen. 12 Yéshidin tartip dolqun kamékof rehberlikide boks bilen shughullinishqa bashlighan. 2009 - 2015 - Yillarda almata shehiri boyiche chémpiyon. 2015 - Yili qazaqistan boyiche chémpiyon. 2013 - Yili ukra'inaning odéssa shehiride ötken xelq'ara musabiqide chémpiyon ataldi. Dilmurat mijitof shundaqla 2014 - yili xitayda ötken xelq'ara musabiqe, 2014 - yili moskwada wéktor agéyéf xatirisige béghishlan'ghan xelq'ara musabiqe, shu yili qirghizistan paytexti bishkekte ötken duyshénkul shopokof xatirisige béghishlan'ghan xelq'ara musabiqe ghalibi. 2015 - Yili u qazaqistanning qizilorda shehiride ötken jumhuriyetlik musabiqide birinchilikni aldi.

Dilmurat mijitofning dadisi rishat oghlining qol yetküzgen utuqlirigha peqet a'ilisiningla emes, belki dost - buraderlirining, pütkül yurtining xursen boluwatqanliqini, ularning meniwi we maddiy jehettin qollap - quwetlewatqanliqini alahide tekitlidi.

Radi'omiz ziyaritini qobul qilghan tenheriket mahiri dolqun kamékof shagirti dilmuratning qabiliyiti heqqide toxtilip, mundaq dédi: "Dilmurat 12 yéshidin tartip meshiq qiliwatidu. Shu waqittila heriketchan, qorqumsiz, bashqilargha qarighanda tirishchan idi. Kichik waqtidinla yaxshi netijilerni körsitip keldi. Mana hazir tenheriket mahiri, qazaqistan boyiche yashlar arisida chémpiyon boldi. Xitay, ukra'ina, rusiyede ötken xelq'ara musabiqilerdimu chémpiyon ataldi. Hazir almata boyiche birinchi orunda turidu. Kélechekte olimpik oyunigha qatnishishqa heriket qiliwatimiz."

Dolqun kamékofning éytishiche, dilmurattin tashqiri yene onlighan qiz - yigitler terbiyilenmekte. Ularnimu yuqiri derijidiki bokschilar derijisige kötürüsh üchün köpligen ishlar qiliniwatidu hem ulardin köp ümidler kütülmekte iken.

Söhbet jeryanida dolqun kamékof özining boks we kik - boksing boyiche yetken utuqliri heqqide mundaq dédi: "Men deslep özbékistanda tenheriket téxnikomida oqup, 1982 - yildin bashlap musabiqilerge qatnashtim. Shu yilliri boks boyiche yashlar arisida özbékistan chémpiyoni boldum. 1989 - Yili almatagha kélip, bu yerde tenheriket institutida oquwétip meshiqlendim. Qazaqistan we ottura asiya tenheriket institutliri arisida ötken musabiqide chémpiyon boldum. 1991 - Yildin bashlap kik - boksing türige öttüm. Qazaqistan we sowét boyiche bashqimu xelq'ara musabiqilerde chémpiyon ataldim. Ürümchide bultur abduréshitning komandisi bilen birlikte on besh künlük meshiqte bolduq we bir künlük musabiqe ötküzduq. Ular bilen alaqimiz yaxshi."

U shundaqla Uyghur élidiki bu boks komandisi bilen pat - patla ariliship, öz - ara tejribe almashturup kéliwatqanliqini, kélechekte yenimu bérish - kélishlerning bolidighanliqini otturigha qoydi.

Aliy derijilik tenheriket mektipi qatarliq her xil tenheriket mektepliride onlighan Uyghur baliliri terbiyilenmekte.

Qazaqistan Uyghurliri arisida kéyinki waqitlarda, yeni 90 - we 2000 - yilliri bolsa, mungluq jelilof, alik jelilof, hémit toxtaxunof, peretjan toxtaxunof, zakir toxtiyéf, ghafur toxtiyéf, dolqun kamékof, shatliq hemrayéf we bashqimu Uyghur yigitliri xelq'ara derijilik tenheriket mahiri ataqlirigha muyesser boldi. Qazaqistan, asiya, xelq'ara da'iride chémpiyon ataldi. Hazir ular yash - ösmürlerni terbiyilep, qazaqistanning tenheriket sahesidiki utuqlirigha öz töhpilirini qoshmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet