Миллийәтчи һәрикәт партийәси рәис намзати, парламент әзаси синан оган мусапир уйғурлардин һал сориди

Түркийәниң әң чоң өктичи партийәлиридин бири болған милләтчи һәрикәт партийәсиниң сабиқ парламент әзаси, мәзкур партийәниң рәис намзати синан оган әпәнди 6 - айниң 12 - күни қәйсәридики уйғур мусапирлар туруватқан қороҗайни зиярәт қилип, улардин һал сориди вә уларниң қейинчилиқлири тоғрисида мәлумат игилиди. Уйғур мусапир өсмүрләр оқуватқан синипларни көздин көчүрди. Синан оган әпәндини дуня уйғур қурултийи муавин рәиси сейит түмтүрк, уйғур мәсчитиниң имами әминҗан вә мусапир уйғур балилар вә чоңлардин болуп 300 әтрапида киши күтивалди.

Зиярәт ахирлашқандин кейин телефон зияритимизни қобул қилған синан оган әпәнди бу һәқтики соалимизға җаваб берип мундақ деди: “мән пүтүн вилайәтләрни айлиниватимән, яхши өтиватиду. Бүгүн қәйсәригә кәлдим. Бу зияритим җәрянида шәрқий түркистанлиқ уйғурлар яшаватқан қороҗайға берип уларни йоқлидуқ. У йәрдә шәрқий түркистанлиқлар билән көрүштуқ, уларниң дәрдини аңлидуқ. Худа буйриса қолимизға пурсәт кәлсә, у райондики мәсилиләрниму биз һәл қилимиз. Һазир һеч болмиғанда буларни күнтәртипкә елип келип һөкүмәтниң бу мәсилини һәл қилишиға түрткә болимиз.”

Синан оган әпәнди уйғур мусапирларниң дәрдини аңлиғанлиқини уларниң көп қейинчилиқи барлиқини, буларни һәл қилиш үчүн қолидин кәлгәнни қилидиғанлиқини баян қилип мундақ деди: “уларниң көп қейинчилиқи бар икән. Туруш рухсити елиш мәсилиси. Балилар чоң боливетипту, оқуш мәсилиси бар икән. юртида қалған йеқинлириниң мәсилилири бар икән. Хитайдин қечип чиқип башқа дөләтләрниң түрмилиридә йетиватқан уйғурлар бар. Булардин дөлитимизниң хәвири бар. Мәнму бу мәсилиләрни һәл қилиш үчүн қолумдин кәлгәнни қилимән.”

Синан оган әпәнди қәйсәридики уйғур мусапирларниң көпиниң кичик балилар вә аяллардин тәркиб тапқанлиқини, буларға дәрһал пуқралиқ берилиши керәкликини баян қилип мундақ деди: “булар кичик бала, бигунаһ кишиләр. Униң үстигә уйғурлар бизниң қериндашлиримиз, уларға игә чиқишимиз керәк.”

Синан оган әпәнди бу қетимқи қурултайда милләтчи һәрикәт партийәсиниң рәиси болуп сайланса, түрк дунясиға болупму шәрқий түркистан мәсилисигә алаһидә көңүл бөлидиғанлиқини баян қилип мундақ деди: “милләтчи һәрикәт партийәсиниң башқа партийәләрдин пәрқи түрк дунясиға алаһидә көңүл бөлүшидур. Шуңа мән партийә рәиси болуп сайлансам, бу сиясәткә уйғун һәрикәт қилимән. Түрк дунясиға, болупму түрк дунясиниң муһим мәсилилиридин бири болған шәрқий түркистан мәсилисигә алаһидә көңүл бөлимән.

Мусапир уйғурлар туруватқан қоро җайниң мәсчитиниң имами әминҗан әпәнди зияритимизни қобул қилип, парламент әзаси синан оган әпәндигә уйғурлар дучар болуватқан мәсилиләрни тәпсилий аңлатқанлиқини баян қилди.

Әминҗан әпәнди мусапир уйғурларниң әң чоң қейинчилиқиниң пуқралиққа өтүш икәнликини баян қилди.

Сабиқ парламент әзаси, милләтчи һәрикәт партийәси намзати синан оган әпәндини күтивалған “шәрқий түркистан мәдәнийәт вә һәмкарлиқ җәмийити” рәиси сейт түмтүрк әпәнди, синан оган әпәнди уйғур мусапирларниң дәрдини аңлиғандин кейин иптар зияпитигә қатнашқанлиқини, иптардин кейин қадир хас йиғин залида өткүзүлгән доклат сөзләш йиғиниға миңлиған кишиниң иштирак қилғанлиқини, бу йиғиндиму синан оган әпәндиниң уйғур мәсилиси һәққидә алаһидә тохталғанлиқини баян қилди.

Сейт түмтүрк әпәнди өктичи партийә рәһбәрлиридин мәрал ақшәнәр ханимниңму мусапир уйғурларни зиярәт қилғанлиқини, бу хил зиярәтләр арқилиқ уйғур мәсилисиниң күн тәртипкә келиватқанлиқини, өктичи партийәләрниң өзлиригә вәдиләр бәргәнликини баян қилди.