Токйода ечилған пәләстингә ярдәм бериши йиғини мусулманларни хош қилди

Өткән айда алҗирийиниң шәрқидики бензин ширкитидә хизмәт қиливатқан японийә газ ширкитиниң хизмәтчи хадимлиридин 17 нәпири тутқун қилинип, мәзкур вәқәдә он нәпири өлтүрүлгән иди.Японийә баш вәзири шинзо абе дәрһал өзиниң алаһидә вәкили, японийә ташқи ишлар министирликиниң муавин министири сузукини мәхсус айропилан билән алҗирийигә әвәтип, алҗирийә тәрәп билән сөһбәт өткүзүшкә,вәқәдә өлүп кәткәнләрниң җәситини японийигә қайтуруп келишкә әвәткән иди.
Ихтиярий мухбиримиз қутлуқ
2013-02-17
Share


Вәқә йүз бәргәндин кейин японийә җәмийитидә яшаватқан мусулманлар японийә җәмийитидики бәзи кишиләрниң ислам диний билән терроризмни бир биригә четип, кишиләрдә ислам диниға, ислам дөләтлиригә болған хата уқумниң пәйда болуп қилишидин әнсиригән иди.

Әмма японийә һөкүмитиниң саһибханлиқида 2 - айниң 13 - күни токйода шәрқий асия әллириниң пәләстинниң тәрәққиятиға ярдәм бериш сәпәрвәрлик йиғини башланғандин кейин японийидики көплигән мусулманлар, японийә һөкүмитиниң бу һәрикитидин толиму хурсән болди.

2 - Айниң 13 - күни токйода башланған японийә ташқи ишлар министирлики саһипханлиқидики тунҗи қетимлиқ шәрқий асия әллириниң пәләстинниң тәрәққиятиға ярдәм бериш сәпәрвәрлик йиғини икки күн ғәлибилик ечилип йепилди. Йиғинға бруней,һиндонезийә,корийә,тайланд,малайшия, сингапор,ветнам, әрәб бирләшмиси вә ислам тәрәққият банкиси һәм бирләшкән дөләтләр тәшкилати қатнашти.

2 - Айниң 14 - күни японийә баш вәзири шинзо абе йетәкчиликидики японийә һөкүмити токйода оттура шәрқтики пәләстин алий һоқуқ кеңишиниң рәһбәрлири билән японийә һөкүмитиниң нурғунлиған түрләр бойичә пәләстингә ярдәм беридиғанлиқи һәққидә вәдиләшкәндин кейин,бу хәвәр 2 - айниң 15 - күни,йәни мусулманларниң җүмә намизи күнидә мәтбуатда елан қилинди. японийидә олтурақлишип яшаватқан көплигән мусулманлар японийә һөкүмитиниң бу алий җанаблиқ инсаний ярдимидин өзлириниң толиму мәмнун болғанлиқини ипадилимәктә.

Биз бу мунасивәт билән токйодики чоң мәсҗитләрдин бири болған түркийә мәдәнийәт мәркизидики түрк мәсҗитигә телефон қилип, җүмә намизидин янған бир қисим мусулманлар билән сөһбәт елип бардуқ. японийидә яшаватқан түркийилик доктор рәфәт зияритимизни қобул қилип мундақ деди:

японийиниң пәләстингә ярдәм бериши толиму яхши бир иш.Японлар бу арқилиқ пәләстиндики нурғунлиған ач - ялиңач балиларни қутқузуп қалалайду.Бу һәқиқәтән инсаний бир ярдәм дәп ойлаймән.Мән шәхсән бир мусулман болуш сүпитим билән японийә һөкүмитигә вә хәлқигә рәхмәт ейтимән.

японийидики сатсума ислам мәдәнийәт мәркизиниң мәсуллиридин бири болған пакистанлиқ доктор муһәммәд авзал бу һәқтә тохтилип мундақ деди:

японийә һөкүмитигә,хәлқигә минәтдарлиқимни билдүримән. Йоқсул инсанларға ярдәм бериш һәр бир исанниң инсаний бурчи. Инсаний ярдәм дин,дөләт вә милләт айримайду.

Илгири оттура шәрқтики әллләрдә көплигән тәтқиқатларни елип барған, һазир японийидики мусулманларниң паалийәтлирини актип қоллап қуввәтләп келиватқан японийилик мусулманларниң дости тәтқиқатчи,норико ханим өзиниң тәсиратини баян қилип мундақ деди:

Шинзо абе җанаблири башчилиқидики бу қетимқи пәләстингә ярдәм бериш сәпәрвәрлик һәрикити, японларниң баш тартип болмайдиған инсаний бурчи, японлар һәргиз алҗирийидики террористлар тәрипидин өлтүрүлгән қериндашлири сәвәбидин ислам диниға, ислам дөләтлиригә һәргиз башқичә көз қарашта болмайду дәп ойлаймән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт