Түрк хаккирлар гурупписи уйғурларни қоллап, хитай торлириға һуҗум қилған

Ихтиярий мухбиримиз пидаий
2015.07.22
Share on WhatsApp
Share on WhatsApp
kok-batyarq-305.jpg Ай йултузлуқ кок байрақ.
Photo: RFA


Хитайлар даирилириниң уйғур елидики роза тутушни чәкләш бәлгилимилири пүтүн дунядики һәр саһәниң әйибләшлири вә зәрбилиригә дуч кәлди. Әнә шуларниң ичидики өзгичә зәрбилири билән уйғурларға мәдәт бәргән бир гуруппа дәл “ай - юлтуз тим хаккирлар гурупписи” дур.

Түрк дуняси хәвәрлиридики мәнбәләрдин ениқлишимизчә, “ай - юлтуз тим түрк хаккирлар гурупписи” 6 - айниң 30 - күнидин 7 - айниң 15 - күнигичә хитай тәвәликидики сода, маарип, сиясәт вә тәшвиқат қатарлиқ саһәләргә тәвә 50 дин артуқ хитай тор бәтлирини чөктүрүвәткән мәлум.

Т рт уйғур бөлүминиң 30 - июн елан қилған хәвиридә көрситилишичә, “ай юлтуз әтрити” бузуп ташлиған хитай тор бәтлириниң һәммисигә, “һәр даим уйғур түрклириниң йенидимиз” дәп сөз қалдурулған вә өзиниң тор бетидә бузуп ташлиған хитай тор бәтлириниң тизимликини елан қилған.

Хәвәрдә: “‛ай юлтуз әтрити‚ намлиқ түрк хаккерлар гурупписиниң хитай тор бәтлиригә чаплап қойған рәсимлиридә ‛бизгә қилич урмиғучә, динимизға һақарәт қилмиғучә, вәтинимизгә бесип киримигичә, миллитимизгә зулум қилмиғучә биздин һеч кишигә зиян кәлмәйду. Силәрниң қиливатқан зулумлириңға қәтий сүкүт қилмаймиз. Түркистан ялғуз әмәс! һәддиңлардин ашмаңлар! ирқий айримчилиқиңларни тохтатмиғучә силәргә арамлиқ йоқ. Түркләрниң сәврини ташурмаңлар!‚ дегән шоарлар йезилған иди, дейилгән.”

“ай - юлтуз тим түрк хаккирлар гурупписи” ниң твттер, фәйсбук вә қатарлиқлардики сәһипилиридә қалдурған мәнбәләрдин ениқлишимизчә, хитайлар бузғунчилиққа учриған тор бәтлириниң бәзилири һелиһәм паләч яки тақалған һаләттә икән.

Тәхмин қилинған санлиқ мәлуматларға қариғанда хитайларниң бу қетимлиқ тор һуҗумида учриған иқтисадий зийини аз болмиған.

“ай - юлтуз тим түрк хаккерлар гурупписи” ниң хитайларға тор һуҗуми қозғаш арқилиқ, уйғурларға һесдашлиқ билдүрүшиниң 2008 - йилидики сәмән вәқәсидин башлап көрүнәрлик болған вә 2009 - йилидики 5 - июл үрүмчи қирғинчилиқиға охшаш вәқәләрдә арилап күчийип келиватқанлиқи мәлум.

Биз тор һуҗуми хаккерлиқ кәспигә алақидар мәлуматлардин вақиплиниш үчүн, голландийәдә яшаватқан пәрһат қадир вә абдусалам әпәндиләрниң бу һәқтики инкасини диққитиңларға сундуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.