Türkiyining chorum wilayitide “Qanighan yarimiz sherqiy türkistan” dégen témida yighin ötküzüldi

2013 - Yili 4 - ayning 30 - küni türkiyining chorum sheherlik hökümet bilen chorum hitit uniwérsitétning birlikte uyushturushi bilen “Qanighan yarimiz sherqiy türkistan” dégen témida yighin ötküzüldi.

Bu yighin chorumdiki turghut yighin zalida ötküzülgen bolup, yighin'gha chorum xelqi we hitit uniwérsitétning oqutquchi we oqughuchiliri bolup köp sanda kishi qatnashti.

Yighinda, hitit uniwérsitétining oqutquchisi proféssor doktor yaqup jiwelek riyasetchilik qildi. Yighinda hitit uniwérsitétining oqutquchisi doktor atawullah shehyar, qurulush binakarliq mutexessisi doktor eli rozi, bilgi uniwérsitétining oqutquchisi doktor murat orxun qatarliq doktorlar söz qildi.

Yighinda proféssor doktor yaqup jiwelek échilish nutiqi sözlidi. Yaqup chiwelek sözide mundaq dédi:

“Dini étiqad we pikir - chüshenche birliki oxshash bolghan sherqiy türkistanliq qérindashlirimiz bügünki kündimu xitay dölitining sistémiliq yürgüzüwatqan bésim we zulum astida yashimaqta. Bu yighinda söz qilghuchilar sherqiy türkistanning ötmüshi, bügüni we kelgüsige alaqidar söz qilip, xitay sherqiy türkistanda yürgüzüwatqan bu zulum we bésimni anglitish arqiliq u yerdiki heqsizliqler toghrisida chorum xelqining diqqitini tartidu we bu mesile toghrisida chorum xelqning küntertipide orun élishqa tirishidu.”

Biz bu yighin toghrisida yighinda söz qilghan hitit uniwérsitétining oqutquchisi doktor atawullah shehyar ependi bilen söhbet élip barduq. Doktor atawullah shehyar ependi, bu yighinning nahayiti yaxshi ötkenlikini, türkiyining chet rayoni bolghan chorum shehiride yashaydighan xelqige Uyghurlar we sherqiy türkistan mesilisini anglitish meqset qilin'ghanliqini shuning üchün bu yighin bek ehmiyetlik bir yighin bolghanliqini bildürdi.