Uyghur mesilisi türk axbarat wasitiliride izchil halda orun almaqta

Muxbirimiz erkin tarim
2016-01-13
Share
turkiye-uyghur-metbuat-fatima-jengiz-hamut-kokturk.jpg Türkiye metbu'atidiki hamut köktürk ependi
RFA/Erkin Tarim


"5 - Iyul ürümchi weqesi" din kéyin bezi türk axbarat wasitiliri izchil halda Uyghur mesilisige orun bérishke bashlidi. Bulardin biri yéshil qaradéngiz radi'osi. Mezkur radi'o kéyinki birqanche yildin béri izchil halda Uyghur mesilisi toghrisida radi'o programmisi ishlep tarqatmaqta. 13 - Yanwar küni radi'o ilham toxtini alahide tonushturdi. 2 Sa'etlik programmida ilham toxtining hayati, uning Uyghur mesilisini hel qilish yolliri toghrisidiki köz qarashliri anglitilghandin bashqa, ilham toxti toghrisida türkiyede neshr qilin'ghan kitab tonushturuldi.

Biz mezkur radi'o we radi'oning Uyghurlargha bolghan qiziqishi toghrisida melumat igilesh üchün radi'oning xojayini imdat özjan ependi bilen söhbet élip barduq.

U, aldi bilen yéshil qaradéngiz radi'osi toghrisida melumat bérip mundaq dédi: "Men 16 yildin béri radi'o ishi bilen shughulliniwatimen. Biz hazir rayon'gha qarita anglitish bériwatimiz. Emdi pütün türkiyege we chet'elge qarita anglitish bérish üchün teyyarliqlirimiz pütüp qaldi. Bundin kéyin radi'o anglitishimizni kéngeytmekchimiz. Yéshil qaradéngiz radi'osi hazir ich anatoliye rayonida anglitish bermekte."

Yéshil qaradéngiz radi'osi 5 - 6 yildin béri izchil halda Uyghur mesilisini anglitip kéliwatqan bolup, her ayda bir qanche qétim türkiyediki Uyghur ziyaliyliri, ammiwi teshkilatlirining mes'ulliri we Uyghur pa'aliyetchiliri bilen söhbet élip bérip Uyghurlarning tarixi, hazirqi weziyiti, tili, edebiyatini anglatmaqta.

Bu radi'oning xojayinining Uyghurlargha bundaq qiziqishidiki seweb néme? bu heqte toxtalghan imdat özjan ependi munularni dédi: "Méning Uyghurlargha qiziqishim birinchisi türk bolushum. Chünki Uyghurlar méning qérindishim. Men ana tereptin qirim tatarimen. Baliliq chéghimdin tartip türkiye sirtida yashighan türkiy milletlerning bésim we zulum astida yashawatqanliqini bilettim. Uning üchün bu qérindashlirimizning derdige derman bolush, ularning derd - elemlirini dunyagha anglitish bizning burchimiz. Uyghurlarning erkinlikke érishidighanliqigha ishenchim kamil bolghachqa, Uyghur mesilisini anglitishni dawamlashturuwatimen. Biz hazir radi'omizda nuqtiliq halda, Uyghur mesilisi, qirim mesilisi, siprus mesilisi, iraq we süriyediki türkmenlerning mesililirini anglitiwatimiz. Türk jama'etchilikige türk 'dunyasining qanighan yarisi bolghan Uyghur mesilisi' ni anglitishni dawamlashturimiz. Allah Uyghur qérindashlirimizgha erkinlik ata qilsun."

Biz mezkur radi'oning söhbet programmilirigha eng köp chiqqan hamut köktürk ependi bilen söhbet élip barduq. U, yéshil qaradéngiz radi'osining uzun yillardin béri izchil halda Uyghur mesilisini anglitip kelgen, merkizi qeyseride turushluq radi'o ikenlikini bayan qildi.

Hamut köktürk ependi radi'oda Uyghur mesilisini anglitishning alahidilikliri toghrisida toxtaldi.

Hamut köktürk ependi bügünki 3 sa'et dawamlashqan radi'o programmisida muddetsiz qamaq jazasigha höküm qilin'ghan ilham toxtining hayatining anglitilghanliqini éytti.

Türkiyediki radi'olar ichide izchil halda Uyghur dawasini anglitiwatqan yéshil qaradéngiz radi'osining Uyghurlar üchün qilghan xizmetliri nahayiti köp bolup, hamut göktürkning éytishiche, türkiyening qeyseri wilayitide Uyghurlarning yaxshi tonulushida mezkur radi'oning töhpisi intayin zor iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet