Uyghur yashlar türkiye jumhur re'isi erdoghan bilen körüshti

Ixtiyariy muxbirimiz arslan
2018-05-16
Élxet
Pikir
Share
Print
11-Nöwetlik xelq'araliq oqughuchilar uchrishishi pa'aliyitide Uyghur oqughuchilar. 2018-Yili 12-may, istanbul.
11-Nöwetlik xelq'araliq oqughuchilar uchrishishi pa'aliyitide Uyghur oqughuchilar. 2018-Yili 12-may, istanbul.
RFA/Arslan

12-May küni istanbulda échilghan 11-nöwetlik xelq'araliq oqughuchilar uchrishishi pa'aliyitining yépilish murasimida Uyghur yashlardin doktor abdusalam teklimakan we tahir kökbayraq qatarliqlar türkiye jumhur re'isi rejep tayyip erdoghan bilen körüshti we xatire resimge chüshti.

Merkizi istanbulgha jaylashqan xelq'araliq oqughuchilar jem'iyetliri fédratsiyesining uyushturushi bilen türkiyening her qaysi sheherliride "Xelq'araliq oqughuchilar uchrishi'ishi" namida her xil medeniyet pa'aliyetliri ötküzüldi. Mezkur pa'aliyet 4 -ayning 1-küni bashlinip, 5-ayning 12-küni istanbulda yépildi. Yépilish murasimigha türkiye jumhur re'isi rejep tayyp erdughanmu qatnashti we chet'ellik oqughuchilar wekilliri bilen körüshüp xatire resimge chüshti.

Bu heqte pikir bayan qilghan "Sherqiy türkistan yéngi nesil herikiti jem'iyiti" ning re'isi, marmara uniwérsitétining dokturanti abdusalam teklimakan bu uchrishishta Uyghurlargha alaqidar héch qandaq bir telep we yaki iltimas sunushqa purset tapalmighanliqini, emma türkiyediki aliy mekteplerde oquwatqan Uyghur oqughuchilargha wakaliten türkiye jumhur re'isi erdoghan bilen körüshüsh pursitige érishkenlikini bildürdi. U jumhur re'isi erdoghan bilen körüshkende özini "Sherqiy türkistanliq Uyghur" dep tonushturghanliqini tekitlidi.

Chet'ellik oqughuchilarning öz-ara tonushushi, medeniyet almashturushi we munasiwet ornitishi meqsitide uyushturulghan "Xelq'araliq oqughuchilar uchrishishi" pa'aliyiti munasiwiti bilen türkiyening kastamonu, konya, adana, samsun, bursa, istanbul qatarliq sheherliridiki aliy mekteplerde oquwatqan Uyghur oqughuchilarmu Uyghur medeniyitini tonushturup, körgezme achti.

Istanbulning péndik rayonida échilighan körgezmide Uyghur oqughuchilargha wakaliten "Sherqiy türkistan yéngi nesil herikiti jem'iyiti" körgezme achqan bolup, bu jem'iyetning re'isi abdusalam teklimakan we mu'awin re'isi tahir kökbayraq qatarliqlar xelq'araliq oqughuchilar fédratsiyesi teripidin 12-may künidiki mezkur pa'aliyetning yépilish murasimigha teklip qilin'ghan we bashqa chet'ellik oqughuchilar qatarida jumhur re'is erdoghan bilen körüshken.

Xelq'araliq oqughuchilar jem'iyetliri fédiratsiyesi teripidin uyushturulghan mezkur pa'aliyet 45 dölettiki 75 sheherde oxshash waqitta uyushturulghan bolup, türkiyening herqaysi sheherliride oquwatqan chet'ellik oqughuchilar bu pa'aliyetke ishtirak qildi.

Yépilish murasimida jumhur re'is erdughan söz qilip, chet'ellik oqughuchilar duch kéliwatqan mesililerni hel qilidighanliqini bildürdi we buningdin kéyin aliy mektep oqughuchiliri iqamet élish üchün saqchi idarisige yaki köchmenler ishliri idarisige barmastin, belki özliri oquwatqan uniwérsitétlardin biwasite iqamet roxsiti we xizmet qilish roxsiti alalaydighanliqini bildürdi.

U mundaq dédi: "Ilgiri méhman oqughuchilargha xizmet qilish ruxsiti bérilmeytti. Bir qanche ay ilgiri bu heqte bezi özgirishler élip bérildi. Insha'alla, pat yéqinda hem aliy mekteplerde oquwatqan oqughuchilar üchün hem oqush püttürgenler üchün ishlesh ruxsiti mesilisi hel bolidu. Emdi türkiyede oquwatqan 115 ming chet'ellik méhman oqughuchilirimizning hemmisi iqamet kinishkisini köchmenler ishliri idarisige barmastin, özliri oquwatqan uniwérsitétlardin alalaydu." erdoghan yene türkiyede oquwatqan chet'ellik oqughuchilargha bundin kéyin téximu yaxshi imkaniyetler yaritishni pilanlawatqanliqini bildürdi.

Bu heqte téximu köp melumatqa érishish üchün "Sherqiy türkistan yéngi nesil herikiti jem'iyiti" ning re'isi, dokturant abdusalam tekliman we bu jem'iyetning idare hey'et ezasi shundaqla fatih sultan mehmet uniwérsitétining oqughuchisi tahir kökbayraq bilen söhbet élip barduq.

Abdusalam teklimakan bu heqte melumat bérip, xelq'araliq oqughuchilar jem'iyetliri fédratsiyesining uyushturushi bilen péndikte échilghan medeniyet körgezmiside Uyghur medeniyitini tonushturup körgezme achqanliqini we bu körgezmide Uyghurlarning medeniyet we örp-adetlirini tonushturush pursitige érishkenlikini bildürdi.

Tahir kökbayraq özining jumhur re'is erdoghan bilen uchrashqanliqini bildürüp, mundaq dédi: "Men abdusalam teklimakan bilen ikkimiz türkiye jumhur re'isi erdughan bilen uchrashtuq. U yerde ademler köp bolghachqa peqet özimizning sherqiy türkistanliq Uyghur ikenlikimizni uqturaliduq. Emma erdoghan buningdin kéyin oqughuchilarning köchmenler idarisige barmastin özliri oquwatqan mekteplerdin iqamet roxsiti alalaydighanliqini we oqughuchilargha yene ishlesh roxsiti bérilidighanliqini bildürdi. Buningdin bizmu nahayiti xursen bolduq."

Xelq'araliq oqughuchilar jem'iyetliri fédratsiyesi 2005-yili chet'ellik oqughuchilarning mesililirini hel qilish üchün istanbulda qurulghan bolup, hazir bu fédiratsiyege 62 oqughuchilar jem'iyetliri we 25 wakaletchi eza bolup orun alghan.

Toluq bet