Түркийәдики аммивий тәшкилатлар ортақ баянат илан қилип хитайниң уйғур сияситини әйиблиди

Мухбиримиз әркин тарим
2014.08.20
turkiye-xitaygha-qarshi-bayanat.jpg Түркийәдики аммивий тәшкилатларниң хитайға қарши ортақ баянат илан қилиш мәйданидин бир көрүнүш
RFA/Erkin Tarim


Түркийәдики 10 чоң аммивий тәшкилатниң мәсуллири 8 - айниң 20 - күни мухбирларни күтивелиш йиғини чақирип хитайниң уйғурларға елип бериватқан сияситиниң зулумға айланғанлиқини ейтти.

Бу мухбирларни күтивелиш йиғини түркийә тарихида тунҗи қетим мәхсус уйғурлар тоғрисида өткүзүлгән пүтүн аммивий тәшкилатларниң алий дәриҗилик рәһбәрлири қатнашқан мухбирларни күтивелиш йиғини һесаблиниду. Бу йиғинға қатнашқан аммивий тәшкилатлар түркийәниң ички вә ташқи сияситигә зор тәсир көрситәләйдиған тәшкилатлар.

8 - Айниң 20 - күни чүштин бурун түркийә һүнәрвән - кассиплар конфедиратсийәси (TESK), түркийә сода - санаәт вә пай - чеки базарлири бирлики (TOBB), түркийә әмгәкчиләр оюшмиси конфедиратсийәси (TİSK), ишчи һуқуқлири оюшмиси, кадирлар оюшмиси, түркийә йеза - игилик башқармилири бирлики, мустәқил сода - санаәтчиләр җәмийити, түркийә екиспортчилар мәҗлиси вә түрк ишчилар оюшмиси мәсуллири бир йәргә җәм болуп, уйғур мәсилиси тоғрисида ортақ баянат илан қилди. Бу баянат бериш йиғиниға көп санда мухбирлар қатнашти.

Түркийә сода - санаәт вә пай - чеки базарлири бирликиниң 14 қәвәтлик бинасидики йиғин залида өткүзүлгән мухбирларни күтивелиш йиғинида ортақ баянат бәргән 10 чоң аммивий тәшкилатниң башлиқлири сәһнидин орун алди. Бу 10 аммивий тәшкилатқа вакалитән түркийә һүнәрвән - кассиплар конфедиратсийәси рәиси паландөкән әпәнди мәтбуат баянатини оқуп өтти. У, баянатида, 20 милйондин көп мусулман уйғур яшайдиған шәрқий түркистанда мусулманларниң диний етиқадиниң чәкләнгәнликини, қериндаш уйғур хәлқиниң чидиғусиз зулумға дучар болуватқанлиқини баян қилип өтти.

У баянатида йәнә, рамизан ейиниң тунҗи күни башланған вәқәләрниң узунғичә давам қилғанлиқини, хитай ахбарат васитилиридики мәлуматларға асасланғанда, онлиған кишиниң өлгәнликини, уйғурларниң ейтишичә, миңлиған кишиниң өлтүрүлгәнликини, хитайниң уйғур сияситиниң зулумға айланғанлиқини баян қилди.

У мухбирларға бәргән баянатида, түркийәдики милйонлиған кишигә вәкиллик қилидиған аммивий тәшкилатлар бирлики болуш сүпити билән, түркийә, хитай мунасивитигә алаһидә әһмийәт беридиғанлиқини, лекин уйғурлар дучар болуватқан наһәқчиликкә вә кишилик һоқуққа хилап сиясәтләргә сүкүт қилип турмайдиғанлиқини, хитайни уйғурларға елип бериватқан бесим сияситини тохтитишқа чақиридиғанлиқини, уйғурларниң бу чекиватқан дәрт - әләмлирини яврупадики аммивий тәшкилатларғиму аңлитидиғанлиқини баян қилип өтти.

Мәзкур мәтбуат йиғини түркийә тарихида уйғурлар үчүн мәхсус елип берилған хитай билән тиҗарәт қиливатқан карханичилар әза болған пүтүн аммивий тәшкилатларниң мәсуллириму қатнашқан йиғин болуп, йиғинға түркийә һүнәрвән - кассиплар конфедиратсийәси башлиқи бәндәви паландөкән,, түркийә сода - санаәт вә пай - чеки базарлири бирлики башлиқи рифат һисарҗикоғлу, түркийә әмгәкчиләр оюшмиси конфедиратсийәси башлиқи әрол кирәсәпи, ишчи һуқуқлири оюшмиси мәсули маһмут аслан, түркийә кадирлар оюшмиси башлиқи исмайил қонҗуқ, кадирлар оюшмиси башлиқи әхмәт гүндоғду, түркийә йеза - игилик башқармилири бирлики вәкили һәсән һүсәйин җошқун, мустәқил сода - санаәтчиләр җәмийити башлиқи анил улпак әпәнди, түркийә екиспортчилар мәҗлиси мудури мәмәт бүйүкшәкши вә түрк ишчилар оюшмиси мәсули әргүн аталай вә д у қ муавин рәиси сейит түмтүрк әпәндиләр қатнашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.