Türkiye-yaponiye munasiwetlirige a'it muhakime yighinida Uyghur mesilisimu muhakime qilindi
2015.08.19
17-Awghust düshenbe küni istanbul tereqqiyat uniwérsitétining sahibxaniliq qilishi bilen yaponiyening ayrim-ayrim besh uniwérsitétidin kelgen bixeterlik we xelq'ara munasiwet mutexessisliri bilen türk tetqiqatchilar jem bolup bir yighin uyushturdi.
Bu yighin, türkiye bilen yaponiye munasiwetliri we xitaygha bolghan köz-qarashlarni muzakire qilish meqsitide uyushturuldi.
Yighin'gha yaponiye tetqiqatchiliridin chihiro kato, michiko kiyomiya, tatrosa hayashi, masaharo hishida, taro takigochi we jiyangrong ju qatarliqlar qatnashqan bolup türk tetqiqatchilardin istanbul tereqqiyat uniwérsitétining mudiri abdulqadir gheyretli we siyasiy bilim we xelq'ara munasiwetler bölümining oqutquchisi dotsént doktor qutay qaraja ilmiy maqale teqdim qilip, türkiye-xitay munasiwetliride sherqiy türkistan mesilisining asasiy mesile ikenlikini otturigha qoydi we türkiyening sherqiy türkistan mesilisini toxtitip qoyushning bir xata siyasetke yol achidighanliqini ipadilidi.
Yighinda yaponlar türkiyening xitay siyasiti we türk-xitay munasiwetliride Uyghur mesilisige qiziqqanliqini bildürüldi.
Bu heqte muxbirlarning ziyaritini qobul qilghan dotsént doktor qutay qaraja, türkiyening xitay siyasiti we Uyghur mesilisi toghrisida toxtaldi.
Doktor qutay qaraja ependi, özining xitay tetqiqatchilar bilen bir qanche qétim uchrashqanliqini, élip bérilghan tetqiqatlar netijiside xitay-türk otturisida asasi mesilining sherqiy türkistan mesilisi ikenlikini yene bir tereptin ikki dölet otturisida yilliqi türkiye töt hesse kem miqdarda dawam qiliwatqan 28 milyard dollar qimmitide bir soda-tijaret munasiwet barliqini bildürdi.