Türkiyediki parlamént saylimida adalet we tereqqiyat partiyesi ghelibe qildi

Ixtiyariy muxbirimiz erkin tarim
2015-11-02
Share
exmet-dawutoghli-dawutoghlu-saylam-tebrik.jpg Adalet we tereqqiyat partiyesi re'isi exmet dawut'oghlu türkiyening paytexti enqerediki adalet we tereqqiyat partiyesining merkiziy binasining üstige chiqip, on minglighan xelq ammisigha tebrik nutqi qilmaqta. 2015-Yili 1-dékabir.
haberturk.com

11-Ayning 1-küni, yeni yekshenbe küni türkiyede qaytidin parlamént saylimi ötküzüldi. Bu saylamda 13 yildin béri hakimiyet béshida turuwatqan adalet we tereqqiyat partiyesidin parlamént saylimida 317 parlamént ezasi saylinip, qaytidin öz aldigha hökümet qurush hoquqigha érishti. Öz aldigha hökümet qurush hoquqigha érishish üchün 550 parlamént ezasidin 276 parlamént ezasigha ige bolushi kérek idi. Bu qétimqi saylamda aq partiye 317 parlamént ezasi chiqirip, hökümet qurush hoquqigha ige boldi.

1-Noyabir künidiki saylamda adalet we tereqqiyat partiyesining awazi 49.4% Ke érishken bolup, 317 parlamént ezasi, öktichi partiyelerdin jumhuriyet xelq partiyesi 135 parlamént ezasi, xelqning démokratiyesi partiyesidin 59 parlamént ezasi, milletchi heriket partiyesidin bolsa 40 parlamént ezasi saylinalighan.

Bu yil 6-ayning 7-künidiki saylamda adalet we tereqqiyat partiyesi öz aldigha hökümet qurush hoquqigha érishelmigendin kéyin, türk qanunigha asasen türkiye dölet re'isi rejep tayyip erdoghan birleshme hökümet qurush hoquqini bash ministir exmet dawutoghlugha bergen idi. Bashqa öktichi partiye bilen birliship birleshme hökümet qurushqa tirishqan bolsimu, emma bu emelge ashmighan we qaytidin saylam ötküzüsh qarar qilin'ghan idi.

Adalet we tereqqiyat partiyesi re'isi exmet dawut'oghlu saylam netijisini öz yurti konyadiki öyide téléwizyedin körgendin kéyin aldi bilen mewlanening qewrisige bérip du'a qildi. Arqidin konya xelqige qutluqlash nutqi qilghandin kéyin, türkiyening paytexti enqerediki adalet we tereqqiyat partiyesining merkiziy binasining üstige chiqip, on minglighan xelq ammisigha tebrik nutqi qildi. U, sözige mundaq bashlidi:
“Türkiyening 81 wilayitide tentenilik halda démokratiye bayrimi ötküzüwatqan qimmetlik wetendashlirim, silerni salamlarning eng yaxshisi bilen salamlaymen. Allaning salimi silerge bolsun. Men bu démokratiye kursidin 78 milyon türk xelqige, 780 ming kwadrat kilométir kengliktiki türkiye zéminigha, hörmitimizni, söygümizni we éhtiramimizni bildürimiz. Quddustin béyrutqiche, bakudin ghazzegiche, araqandin somalighiche, qarabaghdin bishkekkiche, ashxabattin xalepkiche, baghdattin bosniyegiche, bakudin tashkentkiche pütün qérindashlargha, türkiye dölitige, dunyaning herqaysi jayliridiki türkiyeni yaxshi köridighan dostlirimizgha salam yollaymen.”

U türkiyening muqimliqi, ottura sherq döletlirining tinchliqi we dunya tinchliqi üchün adalet we tereqqiyat partiyesige awaz bergenlerge ching könglidin rehmet éytidighanliqini bayan qilip mundaq dédi:
“Peqetla türkiyede we ottura sherqtila emes pütün dunyada tinchliqni berpa qilish üchün aq partiyege awaz bergen qolliringizgha rehmet éytimen. Partiyemiz 2002-yili qurulghan kündin béri partiyemizni qollap keldinglar, bizge awaz bergen bermigen pütün wetendashlirimgha rehmet éytimen. Partiyemizge yene 4 yil türkiyeni bashqurush hoquqi berdinglar, biz silerning ümidinglarni yerde qoymay dölitimizning pütünlüki, xelqimizning parawanliqi we dölitimizning muqimliqi démokratiye üchün küresh qilimiz.”

“Sherqiy türkistan ma'arip we hemkarliq jem'iyiti” re'isi hidayetullah oghuzxan ependi bu saylamda utup chiqqan adalet we tereqqiyat partiyesi re'isi exmet dawutoghlu ependining “Sherqiy türkistan mesilisi”ni yaxshi bilidighan semimiy bir kishi ikenlikini, bu qétim qurulidighan hökümette wezipe alghusi kishilerning ichide Uyghurlargha hésdashliq qilidighan kishilerningmu köp ikenlikini bayan qildi.

Sherqiy türkistan medeniyet we hemkarliq jem'iyiti re'isi séyit tümtürk ependi bu qétimqi saylamda “Sherqiy türkistan dewasi” üchün xeyrlik bir netije chiqqanliqini, parlamént ezasi bolup saylan'ghanlar ichide sherqiy türkistan dewasigha köngül bölidighan köp sanda kishi barliqini bayan qildi.

Bu nöwetlik parlamént saylimi türkiyening ichki we tashqi weziyiti murekkep bir mezgilde ötküzüldi. 6-Ayning 7-künidiki saylamda bir partiye öz aldigha hökümet qurush hoquqigha ige bolalmighandin kéyin p k k térrorluq teshkilati bilen da'ish qisqa waqit ichide üch yüzdin artuq kishini öltürdi. Türkiyeningmu ulargha qarshi herbiy heriketliri kücheygen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet