Малайшияда 62 нәпәр уйғур мусапир тутқун қилинған

Мухбиримиз қутлан
2014-03-18
Share
malayshiya-uyghur-panahliq-tutqun.jpg Малайшияда тутқун қилинған уйғур мусапирлар. 2014-Йили март.
dailysabah.com

Түркийәниң "сабаһ" гезити вә малайшия таратқулириниң хәвәрлиригә қариғанда, 13-март күни малайшияда 62 нәпәр уйғур мусапирниң тутқун қилинғанлиқи мәлум.

Малайшия чегра башқуруш хадимлириниң ашкарилишичә, өткән пәйшәнбә күни 62 нәпәр уйғур мусапир малайшияниң тайланд билән тутишидиған шималий чеграсида тутулған. Малайшия сақчи тәрәп түнүгүн тутқунларниң хитайдики әң сәзгүр район болған шинҗаң уйғур аптоном районидин кәлгән уйғурлар икәнликини илгири сүргән.

Малайшия сақчи даирилириниң ахбарат васитилиригә ашкарилишичә, бу вәқә йеқинда тайландта тутулған 220 нәпәр мусапирдин кейинки йәнә бир қетимлиқ топ һаләттә " чеградин қанунсиз өтүш" вәқәси һесаблинидикән.

Биз бу һәқтә йәниму тәпсилий мәлумат елиш үчүн америка уйғур бирләшмисиниң муавин рәиси илшат һәсән әпәндини зиярәт қилдуқ.

У өзиниң йеқинда малайшияда тутқун қилинған 62 нәпәр уйғур мусапирниң әһвалиға йеқиндин диққәт қиливатқанлиқини тәкитлиди.

Илшат һәсән өзиниң малайшиядики достлири вә шәхсий мунасивәт даириси арқилиқ бу вәқәдин җүмә күни хәвәр тапқанлиқини билдүрди. Униң баян қилишичә, малайшия чегра сақчилири тәрипидин тутқун қилинған уйғур мусапирлар арисида аяллар, һәтта кичик балиларму бар икән. Әң чоңлириниң йеши 40 яштин ашидикән.

У малайшия һөкүмитиниң илгири бирқанчә қетим уйғур мусапирлирини хитайға қайтуруп бәргәнликини тилға алди. У йәнә йеқинда малайшия һава йоллириниң бир йолучилар айропилани ғайиб болуш вәқәси билән малайшия даирилириниң ички-ташқи бесим ичидә туруватқанлиқини, тутқун қилинған мәзкур 62 нәпәр уйғур мусапирниң малайшиядин хитайға қайтурулуш хәвпиниңму мәвҗутлуқини тәкитләп өтти.

Илшат һәсән зияритимиз җәрянида йәнә б д т, америка вә хитай тәрәпниң малайшияда тутқун қилинған уйғур мусапирлири һәққидики ахбарат инкаслири һәққидә тохталди. Шуниң билән бир вақитта йәнә, уйғур мусапирлириниң түрлүк йоллар билән малайшияға топлишип қелишиниң сәвәблири һәққидә өз қарашлирини оттуриға қойди.

Ахирида у, бу қетим малайшия сақчилири тәрипидин тутқун қилинған 62 нәпәр уйғур мусапирниң тәқдири мәсилисидә малайшия һөкүмәт тәрәпкә нисбәтән өзиниң анчә чоң үмидтә әмәсликини тәкитлиди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт