Malayshiyada 62 neper Uyghur musapir tutqun qilin'ghan

Muxbirimiz qutlan
2014-03-18
Share
malayshiya-uyghur-panahliq-tutqun.jpg Malayshiyada tutqun qilin'ghan Uyghur musapirlar. 2014-Yili mart.
dailysabah.com

Türkiyening “Sabah” géziti we malayshiya taratqulirining xewerlirige qarighanda, 13-mart küni malayshiyada 62 neper Uyghur musapirning tutqun qilin'ghanliqi melum.

Malayshiya chégra bashqurush xadimlirining ashkarilishiche, ötken peyshenbe küni 62 neper Uyghur musapir malayshiyaning tayland bilen tutishidighan shimaliy chégrasida tutulghan. Malayshiya saqchi terep tünügün tutqunlarning xitaydiki eng sezgür rayon bolghan shinjang Uyghur aptonom rayonidin kelgen Uyghurlar ikenlikini ilgiri sürgen.

Malayshiya saqchi da'irilirining axbarat wasitilirige ashkarilishiche, bu weqe yéqinda taylandta tutulghan 220 neper musapirdin kéyinki yene bir qétimliq top halette “ Chégradin qanunsiz ötüsh” weqesi hésablinidiken.

Biz bu heqte yenimu tepsiliy melumat élish üchün amérika Uyghur birleshmisining mu'awin re'isi ilshat hesen ependini ziyaret qilduq.

U özining yéqinda malayshiyada tutqun qilin'ghan 62 neper Uyghur musapirning ehwaligha yéqindin diqqet qiliwatqanliqini tekitlidi.

Ilshat hesen özining malayshiyadiki dostliri we shexsiy munasiwet da'irisi arqiliq bu weqedin jüme küni xewer tapqanliqini bildürdi. Uning bayan qilishiche, malayshiya chégra saqchiliri teripidin tutqun qilin'ghan Uyghur musapirlar arisida ayallar, hetta kichik balilarmu bar iken. Eng chonglirining yéshi 40 yashtin ashidiken.

U malayshiya hökümitining ilgiri birqanche qétim Uyghur musapirlirini xitaygha qayturup bergenlikini tilgha aldi. U yene yéqinda malayshiya hawa yollirining bir yoluchilar ayropilani ghayib bolush weqesi bilen malayshiya da'irilirining ichki-tashqi bésim ichide turuwatqanliqini, tutqun qilin'ghan mezkur 62 neper Uyghur musapirning malayshiyadin xitaygha qayturulush xewpiningmu mewjutluqini tekitlep ötti.

Ilshat hesen ziyaritimiz jeryanida yene b d t, amérika we xitay terepning malayshiyada tutqun qilin'ghan Uyghur musapirliri heqqidiki axbarat inkasliri heqqide toxtaldi. Shuning bilen bir waqitta yene, Uyghur musapirlirining türlük yollar bilen malayshiyagha topliship qélishining sewebliri heqqide öz qarashlirini otturigha qoydi.

Axirida u, bu qétim malayshiya saqchiliri teripidin tutqun qilin'ghan 62 neper Uyghur musapirning teqdiri mesiliside malayshiya hökümet terepke nisbeten özining anche chong ümidte emeslikini tekitlidi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet