Amérika Uyghurlirining qurban héytliq yighilishi we Uyghur moysipitlirining héyt tebriki

Muxbirimiz eziz
2017.09.01
amerikida-qurban-heyt-2017.JPG Amerika Uyghurliri kurban heyt namizida. 2017-Yil 1-sintebir, wirginiye.
RFA/Eziz

Amérikidiki Uyghur jama'iti bu yilmu bir yerge jem bolup qurban héyt namizini birge oqudi hemde bir-birining ayimini qizghin tebriklidi, shuning bilen birge wetendiki Uyghurlar üchün du'agha qol kötürdi. Muhajirettiki Uyghur moysipitliridin dunya Uyghur qurultiyi re'isi rabiye qadir xanim we erkin alip tékin ependi radiyomiz arqiliq Uyghur élide iztirap chékiwatqan Uyghurlargha özlirining qurban héytliq salam yollidi.

Muhajirettiki Uyghur jama'iti üchün her yilqi qurban héyt namizi tolimu hayajanliq deqiqilerning biri hésablinidu. Bu künde Uyghurlar bir yerge jem bolup héyt namizini birlikte oqupla qalmastin, yene muhajirettiki musapirliq hayatida kem nésip bolidighan Uyghurluq tuyghusidin birlikte huzurlinidu. Bügünki 2017-yilliq qurban héyt namizimu shundaq boldi.

Amérikining wirginiye we mariland shtati, shuningdek bu jaylargha qoshna rayonlardiki bir qisim Uyghur jama'iti bügün seher fayrfaks shehiridiki “Bést wéstérn” méhmanxanisining zaligha yighilip, wirginiyediki Uyghur diniy zatliridin nurdun hajimning imametchilikide qurban héyt namizini birlikte oqudi. 

Amérika Uyghur birleshmisi biwasite teshkilligen bügünki qurban héyt namizi gerche amérikidiki normal xizmet künliridin bolghan jüme künige toghra kelgen bolsimu, Uyghur jama'itining köp qismi a'ile-tawabi'atliri bilen birlikte héyt namizigha jem boldi.

Héytliq namazdin kéyin jama'et wetendiki qatmu-qat siyasiy bésimlar tüpeylidin teshwish ichide héyt ötküzüwatqanlar, shuningdek türmilerde héyt xushalliqidin mehrum qilin'ghanlar üchün nurdun hajimning yétekchilikide birlikte du'a qildi.

Namazdin kéyinki tebligh nutqida nurdun hajim söz qilip, muhajirettiki Uyghurlar üchün ömlük we ittipaqliqning eng zor bayliq ikenlikini, buning bir ipadisi muhajirettiki Uyghurlarning imkan bar bir yerge jem bolup héyt namizi oqushtimu öz ipadisini tapidighanliqini tekitlidi.

Bu qétimqi qurban héyt namizi yighilishini teshkilligen amérika Uyghur birleshmisining re'isi ilshat hesen ziyaritimizni qobul qilip, chet'ellerdiki Uyghur jama'itining mushu xildiki héyt-bayramlarni birlikte tebriklishining tolimu ehmiyetlik bolidighanliqini algha sürdi.

Bu yilqi qurban héyt munasiwiti bilen dunya Uyghur qurultiyining aliy rehbiri rabiye qadir xanim radiyomiz arqiliq wetendiki Uyghurlargha özining otluq salimini, shundaqla tileklirini yetküzüp qoyushni hawale qildi.

Dunya Uyghur qurultiyining sabiq re'isi, Uyghur milliy dawasining péshqedemliridin erkin alip tékin aka weten ichi-sirtidiki barliq Uyghurlargha özining qurban héytliq salimini yollidi. Shuning bilen birge Uyghurlarning herqachan ümidwar bolushi lazimliqini tekitlidi.
Héyt namizidin kéyin jama'et amérika Uyghur birleshmisi teshkilligen héytliq nashta üstelliride nashta qilghach qizghin söhbette boldi. Shuningdek bir-birige héytliq tileklirini bildürüshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.