Японийәниң нагасаки, токйо қатарлиқ шәһәрлиридә хитайға қарши намайиш вә йиғин өткүзүлди

Ихтиярий мухбиримиз һаҗи қутлуқ қадири
2015-07-09
Елхәт
Пикир
Share
Принт
8-Июл токйодики хитай әлчиханиси алдида өткүзүлгән намайиш
8-Июл токйодики хитай әлчиханиси алдида өткүзүлгән намайиш
RFA/Haji Qutluq Qadiri


5 - Июл вә 8 - июл күнлири японийәниң нагасаки, токйодики шәһәрлиридики хитай әлчиханиси вә консулханиси алдида 5 - июл үрүмчи қирғинчлиқиниң 6 йиллиқини хатириләш йүзисидин намайиш өткүзүлди.

Японийәниң нагасаки шәһиридики хитай консулханиси алдида елип бериливатқан намайишни японийәдики хитайдики милләтләр кишилик һоқуқ мәсилиси тәшкилати уюштурған болуп, мәзкур тәшкилатниң мәсуллиридин теббий пәнләр доктори, атағлиқ дохтур иванага әпәнди сөзидә, бүгүн 5 - июл үрүмчи қирғинчилиқида наһәқ өлтүрүлгән уйғур яшлирини әсләш билән биргә, вәқәниң келип чиқишиға сәвәбчи болған хитай һөкүмитини әйибләп, вәқәдә қанунсиз қолға елинған уйғур яшлириниң түрмидин балдурақ қоюп берилишини тәләп қилди. Намайиш әтигән саәт ондин он иккигә қәдәр икки давам қилғандин кейин намайишчилар вәкили хитай консулханисиға өзлириниң наразилиқ хетини тапшурди.

Намайиштин кейин, көпчилик нагасакидики нютен меһманханисиниң йиғин залиға җәм болуп 5 - июл қирғинчилиқи һәққидә сөһбәт йиғини ачти.

5-Июл күни нагасакида өткүзүлгән хатирләш паалийити.
5-Июл күни нагасакида өткүзүлгән хатирләш паалийити. Photo: RFA

Йиғинда алди билән дуня уйғур қурултийи иҗраийә комитетиниң рәиси долқун әйсаниң нагасакидики бу паалийәткә йоллиған тәбрик сөзи оқуп өтүлди. Йиғинда нагасаки,окинава, кагошима қатарлиқ шәһәрләрдики университетларниң профессорлири 5 - июл үрүмчи вәқәси һәққидә өзлири тәйярлиған доклатларни көпчиликкә сунди. Йиғин чүштин кейин саәт бирдин төткә қәдәр давам қилди.

Шу күни йәнә, дуня уйғур қурултийиниң японийәдики вәкили доктор турмуһәммәт һашим қатарлиқ уйғурларниң орунлаштуруши билән токйо шинҗукудики көп мәдәнийәт сарийиниң йиғин залида 5 - июл үрүмчи қирғинчилиқиниң 6 йиллиқи вә 28 - июл йәкән вәқәсиниң бир йиллиқи хатириләнди. Зияритимизни қобул қилған доктор турмуһәммәт һашим хатириләш йиғиниға қатнашқан бир қисим шәхсләр һәмдә йиғинға қатнашқан японийә парламент әзалириниң 5 - июл вәқәси вә йәкән вәқәси һәққидә баян қилған сөзлири һәққидә қисқичә тохтилип өтти. Йиғин саһипханлиридин бири болған гүлистан ханим бу қетимқи йиғинниң әһмийити һәққидә, японийәдики уйғур сиясий актиплардин ғалип йиғиндин алған тәсирати һәққидә қарашлирини баян қилди.

Ундин башқа йәнә, 8 - июл токйодики хитай әлчиханиси алдида уйғур вә японлар бирликтә 5 - июл қирғинчилиқи вә 28 - июл йәкән вәқәси мунасивити билән намайиш елип барди.

Юқириқи аваз улинишидин тәпсилатини аңлаң.

Пикирләр (0)
Share
Толуқ бәт