Yaponiye Uyghur jem'iyiti tayland hökümitini Uyghur musapirlar mesilisige köngül bölüshke chaqirghan

4-Iyun yaponiye Uyghur jem'iyiti tayland hökümitige mektub yollap taylandtiki Uyghur musapirlar mesilisige köngül bölüshke chaqirghan.

Yaponiye Uyghur jem'iyitining tor bétidin igilishimizche, mezkur jem'iyet tokyodiki tayland elchixanisigha mektub yollap tayland türmiside achliq élan qilghan Uyghur musapirlarning hayatidin özlirining endishe qiliwatqanliqini we shundaqla tayland hökümitining xelq'ara qanun ‏- nizamlargha emel qilghan halda ularning üchinchi bir döletke aman-ésen bériwélishqa yardem qilishini sorighan.

Ziyaritimizni qobul qilghan yaponiye Uyghur jem'iyitining re'isi ilham mahmut tayland hokumitige yollan'ghan mektub heqqide toxtaldi.

Tayland hökümitige yollan'ghan mektubta budda eqidilirige tarixtin buyan étiqad qilip kéliwatqan taylandliqlarning budda ehkamlirigha hörmet qilghan asasta Uyghur musapirlirigha insaniy mu'amilide bolushi telep qilin'ghan.

Ilham mahmutning bildürüshiche, yaponiye Uyghur jem'iyiti tokyodiki tayland elchixanisigha mezkur mektubni we Uyghur musapirlargha da'ir bashqa matériyallarni yollighandin kéyin ,elchixana xadimliri derhal jawab qayturup özlirining bu mesilini tashqi ishlar misnitirliqigha yetküzidighanliqini bildürgen.

Ilham mahmutning éytishiche, yaponiye Uyghur jem'iyiti taylandtiki Uyghur musapirlar mesilisini jiddiy bir terep qilish üchün yaponiyediki bir qisim kishilik hoquq teshkilatlirini heriketke keltürüshke tirishiwatqan bolup, mezkur jem'iyet shundaqla her qaysi döletlerdiki Uyghurlarningmu jiddiy heriketke otüshini ümid qilidiken.

Yaponiyediki musteqil Uyghur mesililiri tetqiqatchiliridin aroma sato bu heqte ziyaritimizni qobul qilip:“ Tayland hökümiti Uyghur musapirlirigha toghra adil mu'amilide bolmisa,tayland xelq'ara jem'iyetning qarshiliqigha uchrash bilen birge, xelqara jem'iyetning ishenchisidin ayrilip qalidu. Shunga biz bu xil mektublar arqiliq tayland hökümitige Uyghur musapirlar mesiliside semmiy meslihet bérishimiz kérek” dédi.

Biz axirida, tokyodiki tayland elchixanisigha köp qétim téléfon qilip taylandtiki Uyghur musapirlar mesilisi toghrisida bezi bir uchurlargha ige bolmaqchi bolghan bolsaqmu, biraq qarshi terep téléfonimizni peqetla qobul qilmidi.

Yuqiriqi awaz ulinishidin tepsilatini anglang.