Японийә асаһи шимбон гезити: ши җинпиң йеңи сиясәт бәлгиләп, қарши күчләрни бастуруп, өз күчини намайән қилмақчи
2014.03.07
Японийәдин чиқидиған “асаһи шимбун гезити” ниң 4 - марттики санида “ши җинпиң һакимийити немә қилмақчи?”, “ши җинпиң һакимийәткә қарши күчләр вә террорға йол қоймайду” сәрләвһилик мақалиләр бесилған.
Мақалидә 5 - март күни ши җинпиң йитәкчиликидики һакимийәт 12 - нөвәтлик хәлқ қурултийи 2 - йиғинини башлайдиғанлиқини, ши җинпиң һакимийити өз образини тикләш, өз күчини көрситиш үчүн хәлқ алдида миң тиришсиму, әмма һакимийәт қатлимидики йошурун аҗизлиқлириниң йәнила ашкарилинип қиливатқанлиқини билдүргән.
Мақалидә “ши җинпиңниң арзуси толиму игиз йәргә есилған арзу. У, бу арзусиға йитиш үчүн толиму көп бәдәл толәшкә дуч келиду” дейилгән.
Мақалидә шундақла ши җинпиң һакимийитиниң хитайдики сиясий өктичиләргә, террорлуққа һәргиз йол қоймайдиғанлиқини илгири сүргән.
Асаһи шимбун гезитидә елан қилинған мәзкур мақалидә ши җинпиң һакимийитиниң хитайдики чириклик вә парихорлуққа зәрбә бериштә түрткилик һәрикәттә болуватқанлиқини көрситип, буниң мисали сүпитидә, хитай мәркизи телевизийә истансисиниң 9 - февралдики програмисида көрситилгән гуаңдуң өлкисиниң дуңгуән шәһиридики бир қисим меһманхана вә паһишиханиларниң әмәлий әһвали баян қилинған.
Мақалидә хитай мәркизи телевизийә истансисиниң мәзкур программисидин кейин, гуаңдуңдики йәрлик һөкүмәтниң бу районда мәхсус тәкшүрүш елип бериш нәтиҗисидә 18372 паһишханә байқилип, 920 кишиниң қолға елинғанлиқини баян қилған.
Мақалидә дейилишичә, ши җинпиң сияситиниң түп мәқсити болса, җәмийәттики бу хил чирик һадисиләргә зәрбә бериш болуп, техи йеқиндила хитайдики йәр - земин министирлиқидики һоқуқидин пайдилинип пара алған 31 әмәлдар вәзипидин қалдурулған. Ху җинтав һакимийитидики 9 - нумурлуқ әрбаб җу йүңкаң башчилиқида йүздин ошуқ әмәлдар иқтисадий мәсилә сәвәбидин қолға елинған болуп буниң ичидә һәтта бәзи министирларму барикән.
Мақалидә “ ши җинпиң 3 - айниң 1 - күни кунмиңдики вәқәгә хитай компартийиси мәркизи комитети сиясий қанун комитетиниң мәсули мең җйәнҗуни өзи бивастә вәқәни тәкшүрүп келишкә әвәтти. Ши җинпиң азсанлиқ милләтләр районини бастуруш үчүн “бөлгүнчи, террорчи” дегән намларни қоллинип уларни қаттиқ бастурди. У, террорға қарши турушни йолға қойди. У,һәмишә сенкаку арили, җәнубий деңиз, деңиз - окянлардики хитайниң игилик һоқуқ мәсилиси қатарлиқ мәсилиләрни оттуриға көтүрүп чиқип, дөләт бихәтәрлики комитетини қурди. Өзи мәзкур комитетниң рәисликигә сайланди. Бу комитетниң түп вәзиписи аз санлиқ милләтләрни бастуруш, дөләтләр ара тоқунушларни һәл қилишни мәқсәт қилған” дейилгән.
Мақалидә йәнә ши җинпиң бу қетимқи хәлқ қурултийида өзиниң һоқуқини вә күчини толуқ көрситидиғанлиқини билдүргән.
Мақалидә ши җинпиңниң бу йил 1 - айниң ахирида ички моңғулийидә зиярәт болғанлиқини баян қилинип “хитайниң ахбарат вастилири бу көрүнүшләрни қайта - қайта көрситип ши җинпиңниң хәлқләр билән мәңгү биргә туридиғанлиқини тәшвиқ қилди, буниңдики түп сәвәб өзиниң көйүмчан, хәлқләрниң турмушиға көңүл бөлидиған хәлқчил даһи икәнликини намайән қилиштур” дейилгән.
Мақалидә дейилишичә, хитайдики милләтләр мәсилисини тәтқиқ қилидиған, хитайниң демократийәлишишини яқилайдиған бир қисим затларниң қаришичә, ши җинпиң һөкүмити һакимийәтниң ислаһат қилинишиға қарши болуп, улар намратларға яр - йөләк болуш арқилиқ, өзлиригә болған қарши күчләрни азайтишни мәқсәт қилидикән.
Мақалидә йәнә, бу қетимқи хәлқ қурултийида ши җинпиң һакимийити йеңи сиясәт бәлгиләп, һакимийәткә қарши күчләрни бастуруп, өз күчини намайән қилидиғанлиқини баян қилған.
Ахирида зияритимизни қобул қилған японийә кюшу университетиниң доктор аспиранти мухтарҗан абдурахман ши җинпиң һакимийитиниң азсанлиқ милләтләргә қаратқан сиясити үстидә өз қарашлирини баян қилип өтти:
Аваз улинишидин тәпсилатини аңлаң.