Yash Uyghur yétekchilirini terbiyilesh kursi amérika dölet mejlisi binasida bashlandi

Muxbirimiz gülchéhre
2015-05-06
Élxet
Pikir
Share
Print
Yash Uyghur yétekchilirini terbiyilesh kursidin bir körünüsh
Yash Uyghur yétekchilirini terbiyilesh kursidin bir körünüsh
RFA/Erkin Tarim


Chet'ellerde pa'aliyet élip bériwatqan dunya Uyghur qurultiyining yéngi bir nöwetlik yash yétekchilirini terbiyilesh kursining échilish murasimi, 6 - may chüshtin burun 9 din bashlap paytext washin'gton'gha jaylashqan, amérika dölet mejlisi binasida otküzüldi.

Murasimgha, dunya Uyghur qurultiyining rehbiri rabiye qadir xanim we mu'awin re'isliri we bashqa pa'aliyetchiler, amérika we dunyaning her qaysi jayliridin kelgen kursant Uyghur yashlardin bashqa, bir qisim amérika awam palata ezaliri, amérika dölet mejlisi ezaliri hemde bir qisim xelq'araliq kishilik hoquq teshkilat wekilliri hemde axbarat wasitilirining muxbirliri bolup 100 etrapida kishi qatnashti.

Dunya Uyghur qurultiyi, amérika Uyghur birleshmisi, xelq'ara Uyghur kishilik we démokratiye fondining hemkarliqi hemde amérika démokratiyini ilgiri sürüsh fondining qollishi bilen uyushturulghan, 10 - nöwetlik dunya miqyasidiki yash Uyghur yétekchi - aktiplirining siyasiy pa'aliyetlirining kesiplishishide zörür bolghan démokratiye, kishilik hoquq hemde xelq'ara qanunlar qatarliq asasiy bilimler boyiche terbiyilesh programmisi 6 - maydin 8 - mayghiche 3 kün washin'gtonda dawam qilmaqchi.

Échilish murasimi sherqiy türkistan milliy marshi sadasida pén uniwérsitétining proféssori, qilich qanat ependining riyasetchilikide bashlandi. Aldi bilen rabiye qadir xanim hayajan ichide : amérika hökümitige amérika tupriqida Uyghur aktipliqigha, yashlargha amérikining siyaset merkizi bolghan dölet mejliside jem bolup öz xelqi we wetinining teqdiri mesililiri üchün yighilidighan bir purset yaritilghanliqigha, teshekkur bildürdi hem kursant yash aktiplarni tebriklidi.

Rabiye xanim yene Uyghur yash aktiplirigha mushundaq bir terbiyilesh kursining échilghanliqining ehmiyitige yuqiri baha bérip: "Bolupmu shi jinping hökümitining sherqiy türkistanda basturushni kücheytken mushundaq bir weziyette dunya miqyasida Uyghur dawasini ilgirilitish üchün téximu köp yash aktiplargha éhtiyajliq biz, téximu köp pidakar erkinlik jengchilirining yétiship chiqidighanliqigha ishinimen idi" dédi.

Murasimda yene amérika palata ezasi, amérika dölet mejlisi tom lentos kishilik hoquq komitéti mu'awin re'isi jim mak gowérn, amérika erkinlik öyining re'isi mark lagon, amérika diniy erkinlik komitéti mu'awin re'isi katrina swétt lantos, amérika kishilik hoquq we démokratiyini ilgiri sürüsh jem'iyiti mu'awin re'isi lo'u'isa gréwe, xelq'ara kechürüm teshkilati asiya ishliri mudiri t. Kumar qatarliq Uyghurlarning kishilik hoquq we teqdiri mesililirige yéqindin köngül bölüp qollap kéliwatqan xelqaraliq organ we amérika hökümitining muhim xadimliri teklip bilen tebrik sözi qilip dunya Uyghur qurultiyi hemde yash kursantlarni tebriklidi we ularning heqliq kürüshini dawamliq qollaydighanliqini ipadilidi.

Ular yene bayanlirida rabiye qadir xanimgha alahide hörmitini bildürüp, rabiye qadir xanimni Uyghurlarning dawa yolidiki yol bashchi, özini millitining dawasigha béghishlighuchi harmas küreshchi dep medhiyilidi we ilham berdi.

Bu xelqara miqyasida Uyghur dawasini élip bériwatqan yashlarning, rehberlik we xizmet qabiliyitini yuqiri kötürüshni meqset qilghan mezkur kursning programma kün tertipige asasen, kursning birinchi küni échilish murasimidin kéyin,kursantlar amérika dölet mejlisining her qaysi komitétlirini ziyaret qilip komitétlarning qurulmisi we amérika hökümitining tüzülmisi xizmet tertipliri qatarliqlat bilen tonushup chiqidu we yene mezkur organlarda ünümlük ish béjirish pa'aliyet élip bérish neziriyiwi bilimlirini emeliy praktikilarda tetbiqlap janliq öginidu.

Bu nöwetlik kursning ilgiriki qétimlardin artuq yene bir teripi kursant yashlar 8 - may, kursning axirqi küni amérika dölet mejlisining bezi ezaliri bilen sherqiy türkistan dewasini ilgiri sürüsh, Uyghur weziyiti we mesililirini chöridep shexsiy söhbet ötküzüsh, so'al sorash pursetlirige ige qilinidu we yene muhakimilerge qatniship Uyghur dawasining ünümini yuqiri kötürüsh yolliri we istratégiyeliri üstide öz pikirlirini otturgha qoyidu. Démek, bu yash aktiplarning zörür bolghan asasiy bilim we pa'aliyet qabiliyitini östürüshte, köp xil shekillik riqabetlik we intayin qiziqarliq we hayajanliq bir qétimliq tejribe toplash pursiti bolidiken.

Biz d u q ning 10 - nöwetlik yash Uyghur aktiplirini terbiyilesh kursining 3 künlük pa'aliyetliridin dawamliq melumat bérimiz.

Toluq bet