“Yeken weqesi”munasiwiti bilen tokyoda naraziliq namayishi ötküzüldi

Essalamu eleykum hörmetlik radi'o anglighuchilar, hazir anglawatqininglar yaponiyening paytexti tokyodiki xitay elchixanisining aldida ötküzülgen Uyghur,yapon,xitaydémokratlirining namayishining ehwali.

Yaponiyening tokyo etrapida yashawatqan melum sandiki Uyghurlar,yaponlar,xitay démokratliri jüme küni yeni 8 - awghust küni tokyodiki xitay elchixanisining aldigha jem bolup 28 - iyul Uyghur élining yeken qatarliq jaylirida élip bérilghan Uyghurlarning diniy pa'aliyetlerni basturush dawamida köpligen bigunah kishilerning öltürülgenlikige naraziliq bildürüp namayish ötküzdi.

Namayishqa xelqara Uyghur insan heqliri we démokratiye fondining yaponiyediki wekili doktor turmuhemmet hashim yétekchilik qildi.

Yaponiye Uyghur intérnét téléwiziye qanili neq meydani süretke élip tarqatti.

Yaponiyediki Uyghur kishilik hoquq mesilisini qollighuchi yaponlar ayyultuzluq kök bayraqni kötürüp namayishqa ishtirak qildi.

Namayish bashlinishtin ilgiri doktor turmuhemmet hashim köpchilikke söz qilip, yéqindin buyanqi Uyghur élide yüz bergen yeken nahiyisining ilushku yézisidiki weqelerge oxshash köpligen weqelerde köp sanda Uyghurlarning öltürülgenliki toghrisida toxtilip ötti.

Namayish dawamida Uyghurlarning kishilik hoquq mesilisige köngül bölgüchi yaponiyediki bir qisim siyasiy teshkilatlarning wekillirimu söz qilip xitayning Uyghur élide élip bériwatqan xitay dölet térrorchiliqigha bolghan özlirining naraziliqini bildürdi.

Namayishchilarning wekilliri sözide yene 1989 - yilidiki 4 - iyun tyen'enmén weqesi,1997 - yilidiki 5 - féwral ili weqesi,2009 - yilidiki 5 - iyul ürümchi weqesi qatarliq weqelernimu eslep ötti.

Namayishchilar qolliridiki plakat we bayraqlirini égiz kötürüp,“Xitay hökümiti Uyghurlarni öltürüshni toxtat, yeken qirghichliqigha jawab ber, Uyghurlargha erkinlik !”dégendek shu'arlarni toxtimay towlap, özlirining küchlük naraziliqini ipadilidi.

Namayish axirisida doktor turmuhemmet hashim naraziliq bayanatnamisini oqup xitay elchixanisining xet sanduqigha saldi.

Namayish chüshtin kéyin sa'et töttin besh yérimgha qeder dawamlashti.

Namayish axirisida ziyaritimizni qobul qilghan doktor turmuhemmet hashim bügünki namayish heqqide toxtilip ötti.

Tepsilatini yuqiridiki awaz ulinishidin anglighaysiler.