Uyghur wekiller türkiye ichki ishlar ministiri sulayman soylu bilen uchrashti

Ixtiyariy muxbirimiz arslan
2018-06-08
Élxet
Pikir
Share
Print
Uyghur wekiller türkiye ichki ishlar ministiri sulayman soylu bilen birge. 2018-Yili 6-iyun. Istanbul, türkiye.
Uyghur wekiller türkiye ichki ishlar ministiri sulayman soylu bilen birge. 2018-Yili 6-iyun. Istanbul, türkiye.
RFA/Arslan

Türkiyediki "Sherqiy türkistan teshkilatliri birliki" re'isi hidayetulla oghuzxan we yawro-asiya türk jem'iyetler fédératsiyesi re'isi isma'il chinggiz qatarliq Uyghur wekiller türkiye ichki ishlar ministiri sulayman soylu bilen uchrashti.

6-Iyun, charshenbe küni istanbulning zeytinburnu rayonigha jaylashqan adalet we tereqqiyat partiyesi zeytinburnu shöbisining uyushturushi bilen zeytinburnu "Poyiz istansisi meydani" da yighin échildi. Yighin'gha minglighan kishi qatnashqan bolup, zeytinburnuda yashaydighan Uyghurlardin nechche yüz kishi qollirida ay yultuzluq sherqiy türkistan bayriqini kötürüp qatnashti. 

Yighinda ministir sulayman soylu zeytinburnu sheher bashliqi murat aydinning hemrahliqida nechche minglighan kishige xitab qildi. Yighinda ministir sulayman soylu türkiyening mezlum xelqlerning yénida bolidighanliqini ipadilep mundaq dédi: "Türkiye pütün mezlumlarning, naheqchilikke uchrighanlarning, qan qérindashlirining qel'esidur we ularning dawamliq ümid menbesi bolidu". 

Biz bu yighin toghrida pikir qarashlirini élish üchün hidayetulla oghuzxan we isma'il chinggiz bilen söhbet élip barduq. 

Hidayetulla oghuzxan, ministir sulayman soylugha Uyghurlarning chimen doppisi we tonini kiydürüsh bilen birge Uyghurlar mesilisi toghrisidiki doklat, bir kitab teqdim qildi hem Uyghurlarning yazma teleplirini sundi.

Telepte türkiyediki Uyghurlarning nopusqa ötüshi, doxturxanida heqsiz dawalinishi, Uyghur mehellisi qurushi, iqamet, yeni, turush shertlirini asanlashturushi, balilarning mektepke ötüsh ishlirini asanlashturushi qatarliqlar yézilghan. Hidayetulla oghuzxan teleplerning qobul bolushini ümid qilidighanliqini we bu ishni yéqindin sürüshte qilidighanliqini bildürdi.

Isma'il chinggiz, sulayman soyluning türk dunyasidiki qandash we qérindashlarning mesililirige yéqindin köngül bölüp kéliwatqanliqini, türkiye parlaméntida köchmenlerning awazi, türk dunyasi xelqlerning wekillik roli oynawatqanliqini shuningdek özining uningdin Uyghurlarghimu yéqindin köngül bölüshni telep qilghanliqini bildürdi.

Toluq bet