Afghanistandiki partlashta 4 amérika eskiri öldi

• 
  2006-02-13

13‏- Féwral küni afghanistanning merkizi rayonigha jaylashqan uruzgan wilayitining dihrawud rayonida yolgha orunlashturulghan bir bomba partlap, töt amérika eskirining ölüshige seweb boldi.

Afghanistandiki amérika herbiy xadimlirining bildürüshiche, partlashtin kéyin taliban pida'iyliri amérika eskerliri we ular bilen birlikte charlashqa chiqqan afghan qisimlirini éghir qorallar bilen oqqa tutqan.

Taliban qalduqlirining tuyuqsiz hujumigha uchrighan amérika herbiy qisimlirigha yardem qilish üchün rayon'gha herbiy tik ucharlar we urushchi ayropilanliri ewetilgen. Toqunushlarda qanchilik taliban pida'iylirining ölgenliki téxi melum emes.

Afghanistanda qaytidin teshkillinishke bashlighan taliban qalduqliri, bolupmu afghanistanning jenubiy we sherqiy rayonlirida afghan milliy armiyisi we afghanistandiki amérika qisimlirigha qaratqan hujumlirini künséri küpeytmekte. Ötken yili afghanistanda yüz bergen toqunushlarda 1500 etrapida afghan puqrasi we taliban pida'iysi we 91 amérika eskiri ölgen.

Amérika birleshme agéntliqining xewer qilishiche, taliban we elqa'ide qalduqliri afghanistanda ötken töt ay ichidila 20 din oshuq özini öltürüwélish xaraktérlik hujum élip barghan.

Xewerlerge qarighanda, nechche minglighan amérika we shimali atlantik okyan ehdi teshkilati herbiy qsi'imliri charlash élip bériwatqan afghanistanning paytexti kabulmu tinch emes iken. 13‏- Féwral küni kabul shehride yolgha orunlashturulghan bir bombining partlishi netijiside ikki afghan eskiri yarilan'ghan. (Qanat)