Talibanlar afghanistanda chet'ellik we afghanistanliqlardin bolup 5 kishini görüge éliwalghan

Afghanistandiki bir ölke bashliqining éytishiche, taliban militanliri afghanistanni qayta qurush programmisini ishlewatqan ikki neper fransiyilikni we ular bilen birlikte xizmet qiliwatqan 3 afghanistanliqni görüge éliwalghan.

Roytérs agéntliqining bügün bergen xewiride eskertilishiche, görüge élin'ghan bu kishiler afghanistanning gherbiy jenubidiki bir ölkide yoqap ketken. Ölke bashliqi, 200 neper bixeterlik xadimigha buyruq chüshürüp, görüge élin'ghan xadimlarni derhal qutquzushni telep qilghan.

Taliban militanlirining bildürüshiche, ular görüge élin'ghuchilarni ferra ölkiside görüge alghan, biri er, yene biri ayal bolghan bu ikki fransiyilik, fransiyidiki xelq'ara kishilik hoquq teshkilatining xizmetchi xadimliri bolup, mezkür teshkilat mexsus balilar ma'aripigha da'ir xizmetlerni ishleydiken.

Afghanistanda yüz bergen mezkur görüge élish weqesi, afghanistanni qayta qurush xizmitige qatnishiwatqan chet'ellik mutexessislerning endishisini qozghash bilen birlikte, afghan hökümitini qattiq jiddiylikke salghan.

Bundin sirt, taliban qarshiliq körsetküchiliri, charshenbe küni qendahar ölkiside yol üstige bomba kömüp partilitish élip barghan, partlashta bir saqchi ölgen we 7 kishi yarilan'ghan.

Afghanistanda taliban militanlirining qarshiliq heriketliri kündin - kün'ge köpiyip, afghanistanni qayta qurush xizmetlirige kashila peyda qilmaqta. (Eqide)