Prézidént bush albaniyini ziyaret qildi


2007.06.10

Gérmaniyidiki sekkiz sana'etleshken dölet bashliqliri yighinini axirlashturghan amérika prézidénti jorj bush yekshenbe küni özining yawropa sepirining yene bir békiti hésablan'ghan albaniyini ziyaret qildi.

Prézidént bush we uning xanimi lora bush albaniyide qizghin qarshi élishqa érishken bolup, tirana ayrodromi we kochilarning ikki teripide qollirida güllerni we amérika bayriqini tutqan nurghunlighan ademler prézidént bushni qarshi alghan shuningdek 21 pay hörmet topi étilghan.

B b s agéntliqining xewer qilishiche, prézidént bush albaniye prézidénti bilen ikki dölet hemkarliq munasiwetliri heqqide söhbetleshken bolup, albaniyidiki ziyaret waqtining aran yette sa'et bolushigha qarimay, prézidént bush makédoniye we krodiye rehberliri hemde iraq we afghanistan urushlirigha qatnashqan albaniye herbiy xadimliri bilen körüshüshni pilan qilghan.

Albaniye hökümiti prézidént bushning kosowaning musteqilliqi mesilisidiki meydanini qizghin qarshi alghan bolup, bush kosowa mesilisini bu qétimqi yighindimu tekitligen. Biraq, rusiye bilen sérbiye kosowa musteqilliqighe izchil qarshi chiqmaqta.

Albaniye yene shimaliy atlantik okyan ehdi teshkilatigha kirishke intilgen bolup, bu jehette amérikining qollishigha muhtaj iken.

Albaniye amérikining térrorizmgha qarshi urushidiki eng yéqin qollighuchisi bolup, gu'antanomoda turup turiliwatqan besh neper Uyghur amérika hökümiti teripidin qoyup bérilgendin kéyin, albaniye hökümiti teripidin qobul qilinip, ulargha bu dölette yashash hoquqi bérilgen idi. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.