Amérika iran etrapidiki déngiz rayonida keng kölemde herbiy manéwir ötküzdi

Amérika déngiz armiyisi yekshenbe küni paris qoltuqining iran bilen chégrilinidighan déngiz rayonida keng kölemde herbiy manéwir ötküzgen bolup, bu amérikining yéqinqi bir qanche yillardin buyan mezkur rayonda élip barghan eng chong manéwiri bolup hésablinidiken.

Gherb agéntliqlirining xewer qilishiche, amérika mezkur manéwirda awi'amatkini öz ichige alghan 9 dane paraxot, 140 dane küreshchi ayropilan ishqa salghan shuningdek uninggha 17 ming neper etrapida herbiy xadim qatnashturghan.

Amérika iraq urushi bashlan'ghandin buyan paris qoltuqi etrapidiki herbiy küchini we rayondiki tesirini izchil ashurup kelgen bolup, yéqindin buyan iranning yadro pilanidin kélip chiqqan ixtilaplar tüpeylidin amérika –iran munasiwetliri jiddiyliship qalghan idi. Iran terep amérika, gérmaniye, fransiye qatarliq döletlerning uran tawlashni toxtitish telipini izchil ret qilip kelgen idi.

Amérika herbiy da'iriliri bu qétimqi manéwir heqqide toxtilip, uning héch qandaq bir döletke qaritilmaydighanliqi, peqet eskerlerni meshiq qildurushnila meqset qilidighanliqini eskertken.

Iran terep bolsa, buning amérikining öz eskerlirining rohini östürüshni meqset qilidighanliqini bildürgen.

Yéqinda amérika bilen iran da'iriliri ikki döletning yéqinqi bir qanche hepte ichide baghdadta iraq mesilisi boyiche söhbet ötküzidighanliqini élan qilghan idi. (Ümidwar)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar