Қазақистан президентиниң америка зиярити давамлишиватиду


2006.09.28

Америкидики зияритини давамлаштуруватқан қазақистан президенти нур султан назәрбайев, бүгүн америкиниң муавин президенти дек чини билән учрашти.

Дек чини өткән йили май ейида қазақистанни зиярәт қилип, бу дөләт рәһбәрлирини сиясий вә иқтисадий ислаһатни давамлаштурушқа чақирған иди. Қазақистан президенти җүмә күни ақсарайда президент җурҗ буш билән учришиду.

Дүшәнбә күни нюйорк шәһиридә қазақистан ташқи ишлар министири тоқайоф билән көрүшүп, икки дөләт рәһбириниң сөһбәт темиси үстидә музакирә илип барған америка ташқи ишлар министири кондализа райис, бу сөһбәткә өзиниң кишилик һоқуқ мәсилисидики ярдәмчиси барий ловән кронниму тәклип қилиш арқилиқ кишилик һоқуқ мәсилисиниң президент буш билән назәрбайеф учришишиниң муһим темисини тәшкил қилидиғанлиқиниң бишаритини бәргән.

Президент назәрбайев җүмә күни ақсарайда президент җурҗ буш билән учрашмақчи.

Бу арида, дуняда демократийини илгири сүрүш үчүн паалийәт елип бериватқан әркинлик сарийи президент бушға хәт әвәтип, назәрбайефниң зияритиниң президент бушниң дуняда демократийә вә кишилик һоқуқни илгири сүрүш үчүн бәргән вәдисини әмәлгә ашуруши үчүн тепилмас бир пурсәт икәнликини билдүрди. Әркинлик сарийи шундақла президент бушни қазақситанниң 2009‏- йили явропа бихәтәрлик вә һәмкарлиқ тәшкилатиниң рәислик вәзиписини қолға кәлтүрүш паалийитини қоллимаслиққа чақирди.

Гәрчә қазақистан оттура асияға җайлашқан бир дөләт болсиму, әмма бу дөләт сабиқ совит җумһурийәтлири билән бирликтә явропа бихәтәрлик вә һәмкарлиқ тәшкилатиниң әзаси. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.