Xelq'ara kechürüm teshkilati yilliq doklat élan qildi

Xelq'ara kechürüm teshkilati seyshenbe küni, dunyadiki kishilik hoquq weziyiti toghrisida 2006‏-yilliq doklatini élan qilip, asiya döletlirining ötken yili kishilik hoquqni depsende qilish üchün térrorchiliqqa qarshi urushtin paydilan'ghanliqini bildürdi.

Doklatta, xitay hökümitining "térrorchiliq" we "dölet mexpiyetlikini ashkarilash" bilen eyiblen'gen kishilerni mexpi sotta sotlighanliqi, afghanistandiki amérika we birleshme armiye qisimlirining we pakistandiki bixeterlik qisimlirining térrorchiliqqa qarshi urush namida kishilerni sewebsiz qolgha alghanliqi tekitlen'gen.

Doklatta shundaqla, amérika prézidénti jurj bushning, xelq'aradiki teleplerge qarimay, gu'entanamodiki herbiy türmini taqimighanliqi qattiq tenqid qilin'ghan.

Doklatta bildürülüshiche, 2005‏- yili xitayda 3900 kishi ölümge höküm qilin'ghan bolup, bulardin 1770 kishi üstidiki ölüm hökümi ijra qilin'ghan. Doklatta yene, xitayda iqtisadiy tereqqiyatning kishilik hoquqning yaxshilinishigha héchqandaq tesir körsetmigenliki hemde, xitaydiki kembegheller we baylar arisida künséri köpiyiwatqan perqning xitayning nachar bolghan kishilik hoquq xatirisining téximu nacharlishishigha seweb boluwatqanliqi tekitlen'gen. (Qanat)