Pelestin milliy herikitining rehbiri yasir arafat wapat boldi

Pelestinning rehbiri yasir arafat peyshenbe küni fransiyining paytexti parizh shehirining sirtidiki bir herbiy doxturxanida, 75 yéshida wapat boldi.

Doxturxana da'irilirining bildürishiche, yasir arafat bir hepte hoshsiz yatqandin kiyin xelq'ara ölchemlik waqit boyiche ikki yérimda jan üzgen. Uning ölümining sewebi téxi resmiy jakalanmidi. Biraq, doxturxana xadimliri arafatning méngisige qan chüshkenlikini we jiger we börikining intayin ajizlap ketkenlikini bildürmekte.

Fransiye axbarat agéntliqining xewirige qarighanda, arafatning jesiti qahirege élip bérilip, jüme küni misirda namizi chüshürilidiken. Uning jesiti ramalla shehiridiki pelestin bash shtabining qorusi ichige qoyilidiken. Ötkenki üch yildin buyan, yasir arafat isra'iliye da'iriliri teripidin ramalladiki bash shtabida qamilip turghan idi.

Pelestin xelqi peyshenbe küni kochilargha chiqip, ularning wapat bolghan rehbirige teziye bildürdi. Yasir arafatning wapatidin kiyin, pelestin parlaméntining re'isi mexmud abbas uning ornigha pelestin hoqoq orginining waqitliq rehbiri boldi. (Arzu)