ئەنگىلىيە باش مىنىستىرى بروۋىن خىتاي ۋە ھىندىستانغا قاراتقان زىيارىتىنى باشلىدى

2008-01-17
ئېلخەت
پىكىر
Share
پرىنت

ئەنگىلىيە باش مىنىستىرى گاردون بروۋىن پەيشەنبە كۈنىدىن ئېتىبارەن، خىتاي ۋە ھىندىستانغا قاراتقان زىيارىتىنى باشلىدى.

ئامېرىكا بىرلەشمە ئاگېنتلىقىنىڭ بىلدۈرۈشىچە ، بۇ بروۋىن ۋەزىپىگە تەيىنلەنگەندىن بۇيان تۇنجى قېتىم ئاسىيادىكى ئىككى دۆلەتتە زىيارەت ئېلىپ بېرىشى بولۇپ، ئۇنىڭ بۇ قېتىمقى زىيارىتىنىڭ ئاساسلىق مەقسىدى ئىقتىساد ۋە مۇھىت مەسىلىسى ئىكەن.

بۇ ئارىدا رېيتېرس ئاگېنتلىقى، خەلقئارادىكى كىشىلىك ھوقۇق تەشكىلاتلىرىنىڭ، بروۋىندىن خىتاي رەھبەرلىرى بىلەن كۆرۈشكەندە چوقۇم كىشىلىك ھوقۇق مەسىلىسىنى تەكىتلىشىنى تەشەببۇس قىلغانلىقىنى ئېلان قىلدى. مەركىزى نيوركتىكى كىشىلىك ھوقۇقنى كۆزۈتۈش تەشكىلاتى، بروۋىنغا بىر پەرچە ئوچۇق خەت يوللاپ، بروۋىننى، ئاخبارات ئەركىنلىكى، قانۇننى توغرا ئىجرا قىلىش، ئۆكتىچىلەرنى تۈرمىدىن قويۇپ بېرىش، دارفۇر مەسىلىسىگە كۆڭۈل بۆلۈش قاتارلىق مۇھىم مەسىلىلەرنى ئوتتۇرىغا قويۇشىنى تەلەپ قىلغان.

كىشىلىك ھوقۇق تەشكىلاتلىرى بىلەن بىر قاتاردا دۇنيا ئۇيغۇر قۇرۇلتىيىنىڭ باياناتچىسى دىلشات رىشىت، رېيتېرس ئاگېنتلىقىنىڭ زىيارىتىنى قوبۇل قىلىپ، بېيجىڭ ھۆكۈمىتىنىڭ ئۇيغۇرلارغا قاراتقان بارلىق سىياسىي زۇلۇملىرىغا خاتىمە بېرىشىنى تەلەپ قىلدى.

ئەنگىلىيە ئەركىن تىبەت ھەرىكىتى تەشكىلاتىمۇ بروۋىنغا مەكتۇپ يوللاپ ، ئۆز تەلەپلىرىنىڭ خىتاي ھۆكۈمىتىگە يەتكۈزۈلۈشىنى تەشەببۇس قىلغان. (ئەقىدە)

پىكىرلەر (0)
Share
تولۇق بەت