Bush, prizdént saylimining jumhuriyetchiler namzati bolushni qobul qildi

Amérika prizdénti jorj w bush, peyshenbe küni nyu-yorktiki jumhuriyetchiler partiyisi memliketlik qurultiyining axirqi küni söz qilip, 11 - aydiki amérika prizdént saylimining jumhuriyetchiler namzatliqini qobul qildi.

U qurultay wekillirige qilghan sözide, özining kéyinki yilda yürgüzidighan ichki- tashqi siyasitini sherhilep, hökümetning térrorizm we iraq herkitini aqlidi. Biraq u, iraqta qirghinchiliq xaraktérlik qorallar tépilmighanliqi üstide köp toxtalmighan. U özining kéyinki 4 yil ichide amérika xelqining parawanliqi we dunya xelqining bixeterliki üchün tirishidighanliqini bildürgen .

Prizdént bush, bu qétimqi saylamgha éniq mexset we aktip pilan bilen qatnishiwatqanliqini jakarlap, amérikining kelgüside térrorizmgha qarshi qet'iy irade bilen küresh qilidighanliqini eskertti. U, dunyagha démokratiyining uruqini chachidighanliqi, téximu bixeter we démokratik dunya berpa qilish yolida ilgirleydighanliqini wede qildi. Prizdént bush qurultaydiki sözide özining 4 yilliq hakimiyet idare qilish jeriyanidiki bezi xataliqlirinimu tilgha aldi. U, ötkenki 4 yil jeriyanidiki bezi siyasetlirining amérika xelqining bir qisimi téripidin qobul qilinmighanliqinimu eskertip ötti. Amérikidiki prizdént saylimi bu yil 11 - ayning 2 - küni ötküzülidu.(Erkin)