Буш германийини зиярәт қилди


2005.02.23

Америка президенти җорҗ в буш брюсселдики зияритини ахирлаштуруп чаршәнбә күни германийигә йетип кәлди. У бу йәрдә германийә баш министири герхард шройдер билән көрүшүп, иран ядро мәсилиси, сүрийиниң ливандин қошун чекиндүрүши вә явропа бирликиниң хитайға қаратқан қорал чәклимисини бикар қилиш мәсилилири үстидә сөһбәтләшти.

Икки тәрәпниң учришиши нәтиҗисидә, буш вә шройдер һәр иккилиси иранда ядро қораллири болмаслиқи керәкликини тәкитлиди. Әмма иранниң ядро қораллири тәрәққиятини қандақ қилип тохтитиш мәсилисидә техи бирликкә кәлмиди.

Буш билән шройдер йәнә, учришиштин кейин мухбирларни күтүвелиш йиғиниға тәң қатнашти. Буш йиғинда шройдерниң иранда ядро қораллириниң болмаслиқида чиң турғанлиқини тәрипләп, "иранниң, пүтүн дуня охшаш бир авазда ядро қораллириниң болмаслиқини тәкитлишини аңлиши муһим әһмийәткә игә" деди.

Шройдерму бу һәқтики мәйданини ениқ чүшәндүрүп, "биз иранниң һәр қандақ ядро қораллириға ' яқ' дийиши керәкликигә тамамән қошулимиз. Иран ядро тәрәққиятини пүтүнләй тохтитиши керәк" деди.

Буниңдин сирт йәнә, шройдер ирақ армийисини чениқтурушқа мақул болди. Әмма у бу һәрикәтниң ирақниң сиртида елип берилиши керәкликини шәрт қилған. Буш германийидә 9 саәт турған болуп, у йәнә пәйшәнбә күни словакийидә русийә президенти виладимир путин билән көрүшмәкчи. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.