Prézidént bush, groziyidiki démokratiyilishish musapisini maxtidi

Amérika prézidénti jorji bush, seyshenbe küni groziye paytexti tiblistiki erkinlik meydanida söz qilip, 2003 - yildiki groziye etirgül inqilabini "dunya xelqining erkinlik mesh'ili bolup qaldi," dep maxtidi.

Dunyaning baghdattin béyrutqiche, béyruttin béshkekkiche ümidwar özgürüshlerge shahid bolghanliqini tekitligen prézidént bush, " biz pütün kapkaziye, ottura asiya shundaqla ottura sherqtiki yashlarning qelbide azadliq otining yalqunjawatqanliqini körüwatimiz," dep körsetti. U "silerning jasaritinglar démokratik islahatchilargha shundaqla pütün dunyagha "erkinlik yer sharidiki her bir dölet we her bir xelqning kélechiki bolup qalidu" dégen signalni berdi dédi.

Prézidént bush, etraptiki döletlerni groziyining zémin pütünlikini we igilik hoquqigha hörmet qilishqa chaqirghan. Közetküchiler, prézidént bush bu sözi rusiyige qaritilghanliqini bildürmekte. Groziyining abghaziye we jenubiy ositiye rayonidiki bölgünchikler rusiye da'irilirining qollishigha érishmekte idi.

Prézidént bush, groziyining yawropa jem'iyitige shundaqla sh a o e t gha qatnishish arzusigha hörmet qilidighanliqini eskertip, amérika groziye ziminidiki rusiye qoshunlirining chékinishini qollaydu, dep körsetti. Groziye prézidénti shakashwili, jorji bushni yiraqni körüsh iqtidarigha bay rehber, dep maxtidi. Prézidént bush, düshenbe küni moskwada 2 - dunya urushi ghelibisining 60 yilliqini xatirilesh pa'aliyitidin kéyin groziyige barghan. Groziye prézidénti shakashwéli moskwadiki murasimgha qatnashmidi. (Erkin)