Киристофер симис: "хитайниң уйғурларға қаратқан пиланлиқ туғут сиясити ерқий қирғинчилиқ түсини алған"


2007.09.18

17 -Сентәбир чүштин кийин америка авам палатасида ечилған йиғинида , хитай һөкүмитигә бесим ишлитидиған497- номурлуқ қарар елинди.

Мәзкур қарар һәққидики муназирә җәрянида , авам палата әзаси киристофер симис хитайниң уйғурларға қаратқан мәҗбурий пиланлиқ туғут сияситини тәнқид қилип " хитай һөкүмитиниң уйғурларға қаратқан пиланлиқ туғут сиясити ерқий қирғинчилиқ шәклидә елип бериватқан болуп , пүтүн бир милләтни йоқитишни мәқсәт қилған " дәп көрсәтти.

Авам палата әзаси киристофер симс әпәнди түнүгүнки йиғин җәрянида йәнә , хитай һөкүмитиниң рабийә қадир пәрзәнтлирини қоюп бериши керәклики һәққидә қилған сөзидә " биз бүгүн ғәйрәтлик әмма қәлби чоңқур азабқа толған бир аниниң 'балилиримни қоювәт' дегән нидасиға җөр болимиз" деди.

Дүшәнбә күни палата әзалиридин рус- ләһтинен ханим, там лантос әпәнди, индиан вәкили буртон әпәнди,қатарлиқлар тәрипидин тәйярлинип, америка авам палатаси ташқи ишлар комитетиға сунулуп мақулланған 497 - номурлуқ қарарда "авам палата әзалири , хитай һөкүмитидин уйғурларниң тил, мәдәнийәт, вә диний һоқуқлирини нәзәргә елиш вә уларға чоқум капаләтлик қилиш, рабийә қадир ханимниң пәрзәнтлирини дәрһал қоюп бериш һәмдә униң пәрзәнтлиригә болған нәзәрбәнд қилишни дәрһал аяғлаштуруш вә канада пуқраси һөсәйин җелилни дәрһал қоюп берип аилиси билән җәм қилиш қатарлиқлар тәләп қилған иди.

Нөвәттә мәзкүр қарар лайиһисиниң мақуллиниши америка вә хәлиқара ахбаратларда уйғур мәсилисиниң йәнә бир қетим юқири рәвиштә гәвдилинишигә сәвәб болди . Бүгүн дуня уйғур қурултейи америка авам палатасиниң уйғурлар һәққидә бу қетим алған мәзкүр қарарини қизғин алқишлап " бу уйғур миллий һәрикити рәһбири , анимиз рабийә қадирниң ғәлбиси шундақла уйғур миллий давасиниң хәлқара сәһнидә чоң бир қәдәм илгирилигәнлики " дәп баһа бәрди. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.