Xitay, parizh sheherlik hökümitining dalay lamagha pexri wetendashliq bérish qararini qattiq tenqid qildi

Xitayda, gherb döletliri we metbu'atining bolupmu, fransiye hökümitining tibet mesiliside tutqan pozitsiyisi we béyjing olimpik mesh'ilining parizh din ötüshi jeryanida yüz bergen weqeler ge qarshi naraziliq namayishliri élip bériliwatqan bir peytte, parizh sheherlik hökümitining, tibetlerning diniy we siyasiy dahisi dalay lamagha pexri wetendashliq bergenliki, béyjing hökümitini qattiq ghezeplendürdi.
Muxbirimiz ömer qanat xewiri
2008.04.22

 Parizh sheher kéngishi teripidin dalay lamagha pexri wetendashliq bérilgenlikini qattiq tenqid qilghan, xitay tashqi ishlar minstirliqining bayanatchisi jang yü, bu heriketni, xitay xelqige qilin'ghan " yene bir haqaret" dep körsetti.

Xitay tashqi ishlar minstirliqining bayanatchisi jang yü, teripidin bu munasiwet bilen élan qilin'ghan bayanatta "dalay lamagha pexri wetendashliq bérilgenliki, xitayning ichki ishlirigha qopalliq bilen arilashqanliq hésablinidu hemde xitay - fransiye munasiwetlirige jiddiy tesir yetküzidu" déyilgen.

U bayanatida, fransiye hökümitidin, tibet musteqilchilirini qollash we ulargha hésdashliq qilishni toxtitip, ikki dölet munasiwetlirige selbiy tesir yetküzüwatqan amillarni yoqitishni telep qildi.

Gerche, xitay tashqi ishlar minstirliqining bayanatida, ismi atalmighan bolsimu, lékin parizh sheherlik hökümiti peqet dalay lamaghila emes, yéqinda xitay hökümiti teripidin xitayda hakimiyetni aghdurush jinayiti bilen eyiblinip, 3 yilliq qamaq jazasigha höküm qilin'ghan, xitay kishilik hoquq pa'aliyetchisi xu jiyaghimu pexri wetendashliq bérishni qarar qilghan.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.