خىتاي ب د ت قىسىملىرىنى دارفۇر رايونىغا ئەۋەتىش مەسىلىسىدە نازلىنىۋاتىدۇ


2006-05-09
Share

جۇڭگو ھۆكۈمىتى سەيشەنبە كۈنى سۇداننىڭ دارفۇر رايونىغا ب د ت تىنچلىق ساقلاش قىسىملىرىنى ئورۇنلاشتۇرۇش پىلانىغا ئىپادە بىلدۈرمىدى. لېكىن دارفۇر رايونىدا تىنچلىقنىڭ ئەسلىگە كېلىشىنى خالايمىز، دەپ كۆرسەتتى. خىتاي تاشقىي ئىشلار مىنىستىرلىقى باياناتچىسى ليۇ جيەنچاۋ، سەيشەنبە كۈنى مۇخبىرلارغا " جۇڭگو تەرەپ خەلقئارا جەمئىيەت بىلەن دارفۇر رايونىدا ئومۇميۈزلىك تىنچلىقنى ئەمەلگە ئاشۇرۇش ئۈچۈن ئىزچىل خىزمەت قىلىدۇ " دەپ تەكىتلىگەن بولسىمۇ، لېكىن جۇڭگو ھۆكۈمىتى ئامېرىكىنىڭ دارفۇرغا ب د ت قىسىملىرىنى ئورۇنلاشتۇرۇش پىلانىنى قوللامدۇ، دېگەن سۇئالغا جاۋاپ بەرمىدى.

ئامېرىكا سۇداننىڭ دارفۇر رايونىدا يەرلىك ئافرىقىلىقلارغا قارشى ئېلىپ بېرىلغان قىرغىنچىلىقنى " ئېتنىك تازىلاش" دەپ ئاتىغان. سۇدان ھۆكۈمىتى بىلەن دارفۇردىكى پارتىزان كۈچلەر ئۆتكەن جۈمە كۈنى ئامېرىكا ۋە ئافرىقا ئىتتىپاقىنىڭ سالاچىلىقى ئاستىدا كېلىشىم ئىمزالىدى. بۇنىڭ بىلەن ېزىدېنت بۇش دۈشەنبە كۈنى ئامېرىكىنىڭ دارفۇر رايونىغا ب د ت قىسىملىرىنى ئورۇنلاشتۇرۇش توغرىسىدا خەۋپسىزلىك كېڭىشىگە تەكلىپ لايىھىسى سۇنىدىغانلىقىنى جاكارلىدى.

ھازىر خىتاينىڭ جەنۇبىي سۇدان رايونىدا 450 كىشىلىك تىچنلىقنى قوغداش قىسىمى بار. ئامېرىكىنىڭ خەۋپسىزلىك كېڭىشىگە يوللىغان تەكلىپ لايىھىسى جەنۇبىي سۇداندىكى ب د ت قىسىملىرىنى دارفۇرغا ئورۇنلاشتۇرۇشنى ئۆز ئىچىگە ئالىدۇ. بۇ خىتاينىڭ جەنۇبىي سۇداندىكى 450 كىشىلىك قوشۇنىنى دارفۇر رايونىغا يۆتكەش مۇمكىنچىلىكى پەيدا قىلىشى مۇمكىن. لېكىن خىتاي سۇدان ھۆكۈمىتىنىڭ ئەڭ چوڭ قورال - ياراق بىلەن تەمىنلىگۈچىسى ۋە سۇدان نېفىتىنىڭ ئەڭ چوڭ خېرىدارى.

دارفۇرغا ب د ت قوشۇنلىرىنى ئورۇنلاشتۇرۇش مەسىلىسىدە خىتاينىڭ مەيدانى مۇھىم رول ئوينايدۇ. چۈنكى خىتاي يېقىندا خەۋپسىزلىك كېڭىشىنىڭ 4 نەپەر سۇدان ئەمەلدارىغا ساياھەت ئىمبارگوسى قويۇش قارارىنى رەت قىلغان. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.