Үрүмчидә әқлий мүлүк һоқуқи мәсилиси бойичә хәлқаралиқ йиғин ечилмақчи


2007.05.29

Техи йеқиндила шаңхәй һәмкарлиқ тәшкилатиға әза дөләтләрниң бирләшмә һәрбий маневир өткүзүш пилани музакирә қилинған үрүмчи шәһири мана әмди йәнә бир хәлқаралиқ чоң йиғинни күтүвелиш алдида турмақта.

Шинҗаң хәвәр ториниң учуридин қариғанда, 30-майдин 1-июнғичә йәр шаридики 50 даңлиқ карханидин кәлгән 70 тин артуқ әрбаб һәм бир қисим дөләт вә районларниң һөкүмәт әмәлдарлири үрүмчигә җәм болуп, әқлий мүлүк һоқуқини қоғдаш мәсилисини музакирә қилидикән.

Хәвәрдин ашкарилинишичә, бу, уйғур елида тунҗи қетим ечилидиған кәң көләмлик иқтисадий мәсилиләргә мунасивәтлик хәлқаралиқ йиғин болуп, буни хитай дөләтлик әқлий мүлүк һоқуқини қоғдаш хизмәт гурупписи башқуриду, конкрет вәзипиләрни шинҗаң ишләп чиқириш қурулуш армийисиниң рәтләш, пиланлаш ишханиси зиммисигә алидикән.

Бу қетимқи йиғинға хәлқарада даңқи бар адидас , форд , панасоник , даймилар-кирисли , нокия, бавҗи қатарлиқ карханиларниң вәкиллириму қатнишидикән.

Нөвәттә, хәлқара сода саһәси әқлий мүлүкләрниң қанунсиз көчүрүлүш, сетилиш қилмишлириниң еғирлиқи сәвәбидин хитайни қаттиқ тәнқид қилишни давамлаштурмақта. Бу мәсилә хитай билән ғәрб дөләтлириниң сода-иқтисадий һәмкарлиқ сөһбәтлиридики муһим темиға айланған болуп, хитайму җавабән йеқиндин буян әқлий мүлүк һоқуқини қоғдаш паалийәтлирини башлиған. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.