Gérmaniye bash ministiri xitay rehberliri bilen élip barghan söhbitide kishilik hoquq mesilisini otturigha qoydi

Xitayda ziyarette boluwatqan gérmaniye bash minstiri anjila mérkel, düshenbe küni, xitay prézidénti xu jintaw we bash minsitiri win jyabawlar bilen körüshkinide, kishilik hoquq qatarliq sezgür mesililerni otturigha qoyup, xitay rehberlirini xelq'ara soda we tereqqiyat qa'ide-qanunlirigha hörmet qilishqa chaqirghan.

Fransiye agéntliqining xewer qilishiche, gerche gérmaniye bash ministirining xitay rehberliri bilen uchrishishida, söhbet témisini asasliqi ikki dölet otturisidiki iqtsadiy munasi'iwetlerni tereqqi qildurush teshkil qilghan bolsimu, lékin gérmaniye bash minstiri kishilik hoquq qatarliq talash-tartishtiki mesililerningmu muzakire qilinishi kéreklikini ipadiligen.

Gérmaniye bash ministiri mérkel, xitay dölet re'isi xu jintaw we bash minstiri win jyabawlar bilen körüshkendin kéyin béyjingda muxbirlargha bergen bayanatida " xitay rehberliri bilen élip barghan söhbetlirimde kishilik hoquq mesilisinimu otturigha qoydum hemde kéler yili ötküzülidighan béyjing olimpik tenheriket yéghini harpisida, dunyaning xitayni téximu yéqindin küzitidighanliqini eskerttim" dédi.

Yéqindin béri, , xelq'ara kishilik hoquq teshkilatliri, Uyghur we tibet kishilik hoquq pa'aliyetchiliri kishilik hoquq weziyitini yaxshilash üchün xitay hökümitige bésim ishletmekte. Ular béyjing olimpik tenherikiti harpisida, xitaydiki kishilik hoquq weziyitige shundaqla xitay hökümitining Uyghur we tibetlerge qaratqan siyasitige qarita ,xelq'ara jama'etning diqqitini tartish üchün pa'aliyetlirini kücheytmekte. (Ömer qanat)