Mérkél, xitayda kishilik hoquq mesilisini otturigha qoyghanliqi üchün alqishqa érishmekte

Gérmaniye bash ministiri an'géla mérkélning, xitaygha qaratqan ziyariti dawamlashmaqta. Xewerlerge qarighanda, gérmaniye bash ministiri bu qétimqi xitay ziyariti jeryanida, xitay rehberliri bilen élip barghan söhbetliride, aldinqi ziyaritining eksiche, kishilik hoquq qatarliq sezgür mesililerni dadilliq bilen otturigha qoyghan.

Siyasiy mulahizichilerning éytishiche, gérmaniye bash ministirining bu qétimqi ziyariti jeryanidiki pozitsiyisi, yawrupa ittipaqining kishilik hoquq qatarliq sezgür mesililerde xitaygha qaratqan siyasitining özgergenlikining bishariti hésablinidiken.

Franisye agéntliqining xewer qilishiche, gérmaniye bash ministiri mérkél, xitay dölet re'isi xu jintawni kishilik hoquqqa hörmet qilishqa chaqirghan. U shundaqla , xitay penler akadémiyiside qilghan sözide, xelqqe erkinlik bérilishi kéreklikini tekitligen hemde béyjing hökümitining ziyankeshlikige uchrighan bir xitay muxbiri bilen körüshken.

Xewerlerge qarighanda, gérmaniye bash ministirining bu qétimqi xitay ziyariti jeryanida, kishilik hoquq mesilisini dadilliq bilen otturigha qoyushi, 2008‏- yilliq béyjing olimpik tenheriket yéghini harpisida, kishilik hoquqqa hörmet qilish toghrisida bergen wedilirige emel qilishi üchün xitay hökümitige bésim ishlitiwatqan xelq'ara jama'etning, bolupmu gérmaniye metbu'atining qizghin alqishigha érishken. (Ömer qanat)