ب د ت نىڭ كىشىلىك ھوقۇق تەكشۈرۈش ئۆمىكى گۈئەنتانامونى زىيارەت قىلىشنى رەت قىلدى


2005-11-01
Share

ب د ت نىڭ كىشىلىك ھوقۇق ئىشلىرى بويىچە تەكشۈرۈش ئۆمىكى گۈئەنتانامودىكى مەھبۇسلار ‎بىلەن ئەركىن ئۇچرىشىشقا يول قويۇلمىغىچە، گۈئەنتانامودىكى مەھبۇسلار بازىسىدا ‎تەكشۈرۈش ئېلىپ بېرىشنى رەت قىلدى. تەكشۈرۈش ئۆمىكىنىڭ ئەزاسى مانفرېد نوۋاك، ئەگەر ‎مەھبۇسلار بىلەن سۆھبەت ئۆتكۈزۈشكە بولمىسا، تەكشۈرۈش ۋەزىپىسىنى ئورۇندىغىلى بولمايدۇ، ‎دەپ تەكىتلىگەن. ‎

بۇنىڭ ئالدىدا ئامېرىكا، ب د ت كىشىلىك ھوقۇق تەكشۈرۈش ئۆمىكىنىڭ گۈئەنتانامودا ‎تەكشۈرۈش ئېلىپ بېرىشىغا يول قويۇدىغانلىقىنى ئېلان قىلغان. بىراق ئامېرىكا ھەربىي ‎دائىرىلىرى، قىزىل كرېست جەمئىيىتىلا گۈئەنتەنامودىكى گۇمانلىق تېرورچىلارنى زىيارەت قىلىشقا ‎ھوقۇقلۇق، دەپ قارىماقتا. ئۇلارنىڭ ئەسكەرتىشىچە، بۇ كىشىلەر قوراللىق توقۇنۇش جەريانىدا ‎ئەسىرگە ئېلىنغان. ‎

ئامېرىكا دۆلەت مۇداپىئە مىنىستىرلىكى ئۆتكەن ھەپتە ب د ت تەكشۈرۈش ئۆمىكىنى بازىدا ‎تەكشۈرۈش ئېلىپ بېرىشقا تەكلىپ قىلغان. ئامېرىكا دۆلەت مۇداپىئە مىنىستىرلىكىنىڭ ‎ئەسكەرتىشىچە، ب د ت خادىملىرىنى تەكشۈرۈش ئېلىپ بېرىشكە تەكلىپ قىلىش، ئامېرىكىنىڭ ‎‎"يوشۇرىدىغان نەرسە يوق ئىكەنلىكىنى" نى بىلدۈرۈش ئىكەن. ‎

گۈئەنتانامو بازىسىدا ھازىر 500 دىن ئارتۇق مەھبۇس تۇتۇپ تۇرۇلماقتا. ئۇلارنىڭ كۆپچىلىكى ‎ئافغانىستاندا ئەسىرگە ئېلىنغان. ئىگىللىشىمىزچە، تۇتقۇنلار ئىچىدىكى بەزى ئۇيغۇرلار بىر ‎قانچە ئاينىڭ ئالدىدا بازا سىرتىدىكى بىر قەدەر ئەركىن رايونغا يۆتكىۋېتىلگەن. (ئەركىن)‎

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت