Hüseyin jélil axiri adwokat bilen körüshüshke muyesser bolalidi

Kanada puqrasi, Uyghur siyasi pa'aliyetchisi hüseyin jélil türmige tashlinip bir ay ashqanda adwokat bilen körüshüshke muyesser boldi.

Melum bolushiche, hüseyin jélil yallighan adwokat xitay bolup, u adwokati bilen peyshenbe we jüme künliri ikki qétim körüshken. Her ikki qétimliq uchrishish ikki sa'et etrapida dawamlashqan.

Ilgiri , xitay da'iriliri ne kanada elchixanisidiki munasiwetlik xadimlarni, ne hüseyin jélil yallighan adwokatlarni uning bilen körüshtürgili qoymighan hemde yene bu yil aprilda hüseyin jélilni ürümchide sotlighanda, kanada elchixana xadimlirining sot meydanigha kirishige yol qoymighan idi. Sotta hüseyin jélilgha xitay sot mehkimisi teyinligen wakaletchi adwokatliq qilghan bolup, bu nöwetlik adwokatni uning uruq- tughqanliri yallighan iken.

Kanadada neshir qilinidighan " yershari mektupliri" gézitide élan qilin'ghan hüseyin jélil heqqidiki bir parche maqalide, kanada Uyghur birleshmisining re'isi memet toxtining éytqanliridin neqil keltürülishiche, hüseyin jélil yallighan xitay adwokatqa hüseyin jélil bilen izchil körüshüshke yol qoyulidighanliqi heqqide kapalet bérilgen.

Ötken ayda kanadaning sabiq bash ministiri pa'ul martin, afriqa tereqqiyat bankisining yilliq yighinigha qatnishish munasiwiti bilen xitayda ziyarette bolghan. Bu jeryanda martin ependi xitay bash ministiri wén jyabaw bilen yérim sa'et etrapida söhbetleshken we hüseyin jélil mesilisini otturigha qoyghan hem wén jyabawdin kanada elchixana xadimlirining hüseyin jélil bilen körüshüshige yol qoyushini telep qilghan idi.

Memet toxtining bildürüshiche, hüseyin jélil bilen körüshüsh ishlirida ongayliq tughulushi, kanada hökümitining bu délodiki meydanining qattiq bolushi we martin ependining xitay rehberliri bilen körüshkenlikining paydisidin iken.

Melum bolushiche, adwokat bilen hüseyin jélilning söhbitige yene bir terjiman we bir mexpiy saqchi qatnashqan bolup, hüseyin jélilning salametlik ehwali yaman emes iken.(Jüme)