Yawrupa ittipaqi pat arida xitaygha qaratqan qoral cheklimisini bikar qilish heqqide qarar chiqarmaydu

Yawrupa ittipaqidiki döletlerning tashqi ishlar ministirliri jüme küni yighin échip, xitaygha yürgüzüwatqan qoral sétip bermeslik cheklimisini bikar qilish yaki qilmasliq heqqide bu yil 6 - aydin burun qarar chiqarmasliqni békitti.

Yawrupa ittipaqining tashqi munasiwetler komisari benita wolidnér bu heqte muxbirlarning ziyaritini qubul qilip, "biz qoral cheklimisni bikar qilishqa qarap dawamliq heriket qilimiz. Biraq bu qarar undaq asan we téz élinmaydu" dédi.

Girmaniye tashqi ishlar ministiri yoshka fishirmu wolidnérning köz qarishigha qoshulup, béyjingning choqum aldi bilen kishilik hoquq xatirisini yaxshilishi we teywen bilen bolghan ixtilapini hel qilishi kéreklikini tekitlidi.

Yawrupa ittipaqi 1989 - yili xitay hökümiti tyen'enmin oqughuchilar démokratik herikitini qanliq basturghandin kiyin, xitaygha qoral sétip bermeslik cheklimisini yürgüzgen. Qoral cheklimisini bikar qilish mesiliside yawrupa ittipaqidiki döletler arisidimu ixtilap bar bolup, fransiye we girmaniye qoral cheklimisini bikar qilish terepdari. Halbuki, en'giliye, daniye, shiwitsariye qatarliq döletler qoral cheklimisini dawamliq yürgüzüshni xalaydu.

Yawrupa ittipaqi tashqi ishlar ministirlirining yighinidin bir kün burun, yawrupa parlaménti, yawrupa ittipaqining xitaygha yürgüzgen qoral cheklimisini bikar qilishigha qarshi turidighan qarar maqullighan idi. (Arzu)