Һиндиистан баш министири хитай зияритини башлиди

2008-01-12
Елхәт
Пикир
Share
Принт

Һиндистан баш министири манмоһансиң, үч күн давамлишидиған хитай зияритини башлиди. Хәвәрләргә қариғанда, һиндистан баш министири бу қетимқи зиярити җәрянида, хитай дөләт рәиси хуҗинтав, баш министир вен җиябав қатарлиқ хитай рәһбәрлири билән учришип, дунядики әң тез тәрәққий қиливатқан икки чоң дөләт һесабланған, һиндистан билән хитай оттурисидики мунасивәтләрни техиму тәрәққий қилдуруш йоллирини музакирә қилидикән.

Һиндистан ташқи ишлар министири, шанкәр мәнон, мухбирларға бәргән баянатида, һиндистан баш министириниң бу қетиқи хитай зияритиниң әһмийити үстидә тохтилип, һиндистан баш министириниң бу қетимқи зияритиниң, һиндистан -хитай мунасивәтлири әң тәрәққий қилған бир мәзгилгә тоғра кәлгәнликини, зиярәттин бурун һиндистан вә хитайниң өз-ара һәмкарлиқини күчәйтиш үчүн бирликтә һәрбий маневер қатарлиқ, бир йүрүш паалийәтләрни елип барғанлиқини әскәрткән.

Әмма, сиясий мулаһизиләрниң ейтишичә, гәрчә һиндистан вә хитай мунасивәтлири тәрәққий қиливатқан болсиму, әмма 1962‏- йилидики уруш сәвәбидин, икки дөләт оттурисида йәнила җиддий ишәнчсизлик мәвҗут болуп, техи һәл қилиниши керәклик нурғун мәсилиләр бар икән.

Уларниң ейтишичә, болупму, хитай билән һиндистан оттурисида мәвҗут чегра ихтилапи, икки дөләт мунасивәтлириниң тәрәққиятиға җиддий тосқунлуқ қилмақта. Һиндистан һөкүмәт хадимлириниң билдүрүшичә, чегра ихтилапи вә хитай әскәрлириниң һиндистан территорийисигә бөсүп кириш әһваллири, баш министир манмоһансиң, хитай рәһбәрлири билән елип баридиған сүһбәтләрниң асаслиқ темилириниң бирини тәшкилләйдикән.

Пикирләр (0)
Share
Толуқ бәт