Amérika, yawrupa ittipaqi, rusiye we xitay wekilliri iranning yadro mesilisini körüshti


2006.01.16

Amérika, en'giliye, fransiye we gérmaniyining wekilliri 16‏- yanwar küni en'giliyining paytexti londonda rusiye we xitay wekilliri bilen uchriship, iranning yadro pilanini eslige keltürgenlikige qarshi qandaq tedbir élish kérekliki mesilisi üstide söhbet élip bardi.

Amérika birleshme agéntliqining xewer qilishiche, iran yadro mesilisini b d t bixeterlik kéngishige élip bérish londondiki uchrishishning asasliq témisini teshkil qilghan.

Amérika, en'giliye, gérmaniye we fransiye iran'gha qarshi qattiq tedbir qollinishqa tirishiwatqan bolup, mezkur töt dölet bu mesilide rusiye we xitayning himayisini qolgha keltürüshke tirishmaqta.

Iran bilen yéqin iqtsadiy munasiwetlerde bolghan rusiye bilen xitay hazirghiche yadro mesiliside iran'gha qarita qattiq tedbir qollinishqa qarshi pozitsiyide bolup kelgen. Emma xewerlerge qarighanda, iranning yadro pilanini eslige keltürüsh qarari hetta rusiye we xitayning pozitsiyisidimu bezi özgirishlerge seweb bolghan.

Iran hökümiti ötken hepte yadro pilanini eslige keltürüp, urani'um tawlash ishini qaytidin bashlighanliqini jakarlighan idi. Iranning bu herikiti amérika we yawrupa ittipaqi döletlirini qattiq endishilendürgen.

Gherb döletliri bolupmu amérika, iranning yadro qoral yasashqa tirishiwatqanliqini bildürmekte. Lékin, iran yadro pilanining peqet éléktir énérgiyisi ishlepchiqirishni meqset qilidighanliqini bayan qilmaqta. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.